संगठनको बलमा चुनाव जितिन्छ : काँग्रेस उम्मेद्वार पाण्डे

राजनिति

गृहपृष्ठ
राजनिति

सेतोपत्र डेस्क शनिबार, माघ १०, २०८२

मेचीनगर, माघ १० । झापा क्षेत्र नं. १ मा नेपाली काँग्रेसले औपचारिक रुपमा आजदेखि चुनावी प्रचार अभियान सुरु गरेको छ । आज एकै दिन मेचीनगरका दुई वटा वडामा प्रचार सम्पर्क कार्यालय उदघाटन गर्दै प्रचार अभियानको सुरुवात गरेको काँग्रेस मेचीनगर ७ का वडा सभापति कञ्चन बरालले बताउनु भयो ।

आज बिहान मेचीनगर ८ को प्रचार सम्पर्क कार्यालय उदघाटन गरेको काँग्रेसले दिउँसो मेचीनगर ७ को प्रचार सम्पर्क कार्यालय सञ्चालनमा ल्याएको छ । इटाभट्टामा रहेको वडा प्रचार कार्यालयको उदघाट्न गर्दै काँग्रेसका तर्फबाट झापा १ का उम्मेद्वार केशवराज पाण्डेले पार्टीको संगठनकै बलमा चुनाव जितिने बताउनु भएको छ । ‘काँग्रेसको संगठन जरासम्म छ,’ पाण्डेले भन्नुभयो, ‘टोल टोलका काँग्रेस कार्यकर्ताहरु बाहिर निस्किए पछि अन्य पार्टीले प्रचार समेत गर्न सक्दैन ।’ काँग्रेसको संगठनकै कारण आफुले चुनाव जित्ने पाण्डेले दाबी गर्नु भयो ।

प्रचार कार्यालय उदघाटनमा बोल्दै काँग्रेस प्रदेश समिति सदस्य तथा मेचीनगरका निवर्तमान प्रमुख बिमल आचार्यले काग्रेसको नेतृत्वमा यस क्षेत्रमा भएका कामको प्रचार गरेर भोट माग्न कार्यकर्ताहरुलाई अपिल गर्नु भयो । कार्यक्रममा बोल्दै काँग्रेसका क्षेत्रीय सभापति इन्द्र बहादुर बुढाथोकीले गगन थापालाई भावी प्रधानमन्त्री मनाउन झापा १ मा काँग्रेसले जिताएर पठाउनु पर्ने बताउनु भयो । ‘लोकतन्त्रको रक्षा र गगन थापालाई प्रधानमन्त्री बनाउन काँग्रेसले जित्नु पर्छ,’ बुढाथोकीले भन्नुभयो ।

कार्यक्रममा काँग्रेसका अग्रज नेता राम कट्टेल, समानुपातिक उम्मेद्वार राधा कार्की, काँग्रेसका अगुवा नेता युद्धराज ओली लगायतले चुनावमा काँग्रेसको सिङ्गो संगठन परिचालन हुनु पर्नेमा जोड दिनुभयो । काँग्रेस वडा सभापति बरालको सभापतित्वमा सम्पन्न कार्यक्रम वडा सचिव सुरज सुवेदीको सञ्चालनमा सम्पन्न भएको थियो ।

प्रकाशित मिति: शनिबार, माघ १०, २०८२ १५:५४