मेचीनगर,पुस २९ । इन्डो नेपाल मेचीनगर मिडिया फुटबल कपको उपाधि भारतको तराई प्रेस क्लब दार्जीलिङले जितेको छ ।सोमबार काँकडभिट्टा माध्यमिक विद्यालयको खेल मैदानमा सम्पन्न फाइनल खेलमा भद्रपुर प्रेस क्लबलाई शून्यका विरुद्ध दुई गोलले हराउँदै दार्जीलिङको तराई प्रेस क्लवले उपाधि जितेको हो ।
खेलको पहिलो हाफ गोलरहित बराबरीमा सकिए पनि दोस्रो हाफमा तराई प्रेस क्लबले आक्रामक प्रदर्शन गर्दै खेल आफ्नो पक्षमा पारेको थियो। उपाधिसँगै बिजेताले नगद ५० हजार प्राप्त गरेको छ भने उपविजेताले नगद . २५ हजार पाएको छ ।
खेलको ३२औँ मिनेटमा प्रवेश भुजेलले गोल गर्दै टिमलाई अग्रता दिलाएका थिए । त्यसपछि ४४औँ मिनेटमा दावा लामाले गोल थप्दै उपाधि सुनिश्चित गरे। फाइनल खेलमा निर्णायक भूमिका खेलेका दावा लामा ‘म्यान अफ द म्याच’ घोषित भए ।
समापन समारोहमा प्रमुख अतिथि मेचीनगर नगर प्रमुख गोपालचन्द्र बुढाथोकीलगायतले विजेता तथा उपविजेता टोलीलाई ट्रफी र पुरस्कार प्रदान गर्नुभयो।
प्रतियोगिताभरिका उत्कृष्ट खेलाडी भद्रपुर प्रेस क्लबका सुशान्त नेपाल घोषित भए। त्यस्तै उत्कृष्ट फरवार्ड आयोजक प्रेस क्लब मेचीनगरका युवराज आचार्य, उत्कृष्ट डिफेन्डर भद्रपुरका राजु पाठक तथा उत्कृष्ट गोलकिपर भद्रपुरकै सुजक राउत बने। विधागत उत्कृष्ट खेलाडीहरूले जनही नगद १ हजार ५ सय रुपैयाँ र ट्रफी प्राप्त गरे। सर्वाधिक गोलकर्ताको उपाधि समेत विजेता टोलीका प्रवेश भुजेलले हात पारे।
प्रेस क्लब मेचीनगरको आयोजनामा सम्पन्न दुई दिने प्रतियोगितामा भारतका दुई र नेपालका छ गरी आठ प्रेस क्लबको सहभागिता रहेको थियो। प्रतियोगिताको संरक्षक मेचीनगर नगरपालिका रहेको थियो भने होटल मेची क्राउन र इष्ट होराइजन अङ्ग्रेजी माध्यमिक विद्यालय धुलाबारीले संयुक्त रूपमा प्रायोजन गरेका थिए।
समापन समारोहमा आयोजक सचिव प्रवीण अधिकारीले कार्यक्रम सञ्चालन गरेका थिए भने खेल संयोजक खगेन्द्र घिमिरेले स्वागत मन्तव्य राखेका थिए। समारोहको अध्यक्षता प्रेस क्लब मेचीनगरका अध्यक्ष प्रकाश पौडेलले गरेका थिए।
