मेचीनगर गोल्डकपबाट साढे २४ लाख बचत

खेलकुद

गृहपृष्ठ
खेलकुद

मेचीनगर गोल्डकपबाट साढे २४ लाख बचत

सेतोपत्र डेस्क मंगलबार, असार ३१, २०८२

पत्रकार सम्मलेनमार्फत आयव्यय सार्वजनिक गर्दै गोल्डकपका पदाधिकारीहरु ।

काकरभिट्टा, असार ३१ । मेचीनगर गोल्डकप सञ्चालन गर्दा साढे २४ लाख रकम बचत भएको छ । गोल्डकपको आयव्यय सार्वजनिक गर्न हिजो आयोजित पत्रकार सम्मेलनमा गोल्डकप आयोजक समितिका उपाध्यक्ष तथा आर्थिक समितिका संयोजक विमल आचार्यले २४ लाख ६१ हजार ४१५ रुपैयाँ बचत भएको सुनाउनु भयो । आयव्यय सार्वजनिक गर्दै आचार्यले गोल्डकपमा एक करोड १५ लाख २९ हजार २०१ रुपैयाँ संकलन भएको र ९० लाख ६७ हजार ७८६ रुपैयाँ खर्च भएको बताउनु भयो । वहाँका अनुसार २५ लाख रुपैयाँ मेचीनगर नगरपालिकाका तर्फबाट र तीन लाख रुपैयाँ कोशी प्रदेश सरकारका तर्फबाट गोल्डकपलाई उपलब्ध भएको थियो ।

गोल्डकप मुल आयोजक समितिका संयोजक श्रीप्रसाद मैनालीको अध्यक्षतामा सम्पन्न पत्रकार सम्मेलनमा बोल्दै संयोजक मैनालीले सबैको सहयोगबाट गोल्डकप भब्य रुपमा सम्पन्न भएको तर प्राविधिक कारणले हिसाब सार्वजनिक गर्न केही ढिला भएको बताउनु भयो । मेचीनगर गोल्डकप संस्था नै दर्ता गरेर गोल्डकपलाई निरन्तरता दिने तर्फ छलफल भइरहेको समेत संयोजक मैनालीले बताउनु भयो ।

गोल्डकपको आयोजनाले मेचीनगर क्षेत्रको आर्थिक गतिविधि चलायमान भएको गोल्डकप आयोजक समितिका कोषाध्यक्ष गंगालाल गुरुङले पत्रकार सम्मेलनमा बताउनु भयो । पत्रकार सम्मेलनमा बोल्दै काकरभिट्टा फुटवल ट्रेनिङ सेन्टरका अध्यक्ष नवराज ओलीले गोल्डकपलाई स्थानीय समुदायले आफ्नो काम भनेर सहयोग गरेकाले नै सफल भएको बताएका थिए । त्यस्तै समितिकी सदस्य सुभद्रा भट्टराईले गोल्डकपको निरन्तरताका लागि सबैले योगदान गर्नु पर्ने बताउनु भएको थियो ।

काकरभिट्टामा सम्पन्न पत्रकार सम्मेलन गोल्डकप आयोजक समितिका सचिव राजु कार्कीको सञ्चालनमा सम्पन्न भएको थियो । मेचीनगर गोल्डकप २०८१ फागुन २४ गतेदेखि चैत २ गतेसम्म सञ्चालन भएको थियो ।

प्रकाशित मिति: मंगलबार, असार ३१, २०८२ ०७:२०

प्रतिक्रिया दिनुहोस्