दुई महिनामा पनि भएन मेचीनगर गोल्डकपको आयव्यय सार्वजनिक

खेलकुद

गृहपृष्ठ
खेलकुद

दुई महिनामा पनि भएन मेचीनगर गोल्डकपको आयव्यय सार्वजनिक

सेतोपत्र डेस्क मंगलबार, वैशाख ३०, २०८२

फइल फोटो ।

काकरभिट्टा, वैशाख ३० । झापाको काकरभिट्टामा सञ्चालन भएको पाँचौ मेचीनगर गोल्डकप फुटवल प्रतियोगिता सम्पन्न भएको दुई महिना बितिसकेको छ । तामझामका साथ सञ्चालन गरिएको गोल्डकप प्रतियोगिताको आयव्यय भने अझै सार्वजनिक भएको छैन ।

प्रतियोगितालाई सहयोग गरेका मुख्य गरेका सहयोगी संस्थाहरुबाट रकम नआएकाले केही भुक्तानी समेत बाँकी रहेका कारण आयव्यय सार्वजनिक गर्न ढिला भएको प्रतियोगिताका कोषाध्यक्ष गंगालाल गुरुङले बताउनु भयो । ‘सबै पैसा प्राप्त भइनसकेकाले केही भुक्तानी गर्नु पर्ने पनि बाँकी नै छ,’ गुरुङले भन्नुभयो, ‘एक साता भित्र प्रतियोगिताको हिसाव सार्वजनिक गर्छौं ।’

प्रतियोगिता आयोजक समितिका संयोजक श्रीप्रसाद मैनाली र आर्थिक समिति संयोजक विमल आचार्यको कार्यव्यस्तताका कारण बैठक बस्न नसकिरहेका कारण हिसाव सार्वजनिक गर्न ढिला भएको प्रतियोगिता आयोजक संस्था काकरभिट्टा फुटवल ट्रेनिङ सेन्टरका अध्यक्ष नवराज ओलीले बताउनु भयो । ‘केही ढिलो भयो तर हिसाब चुस्त दुरुस्त सार्वजनिक गर्छौं,’ अध्यक्ष ओलीले भन्नुभयो ।
करीब एक करोड खर्च गरेको भनिएको मेचीनगर गोल्डकप २०८१ फागुन २४ गतेदेखि चैत २ गतेसम्म सञ्चालन भएको थियो ।

प्रकाशित मिति: मंगलबार, वैशाख ३०, २०८२ ०९:३३