कार्गिल सहिद स्मृति फुटबल सूरुः बाहुण्डागीको विजयी शुरुवात

खेलकुद

गृहपृष्ठ
खेलकुद

कार्गिल सहिद सुरेश थापा क्षेत्री स्मृति दोस्रो जेसीज नकआउट फुटबल प्रतियोगिता कार्गिल सहिद स्मृति फुटबल सूरुः बाहुण्डागीको विजयी शुरुवात

सेतोपत्र डेस्क बिहीबार, चैत १५, २०८०

बाहुनडाँगी, चैत्र १५। कार्गिल शहिदस्मृति फुटवल प्रतियोगितामा बाहुनडँगी फुटवल क्लवले विजयी शुरुवात गरेको छ । आज भएको प्रतियोगिताको उदघाटन खेलमा कचनकवल फुटबल क्लबविरुद्ध २–० को सहज जीत निकाल्दै बाहुनडाँगी युवा क्लबले कार्गिल सहिद सुरेश थापा क्षेत्री स्मृति दोस्रो जेसीज नकआउट फुटबल प्रतियोगितामा विजयी शुरुवात गरेको हो । मेचीनगर ४ स्थित सरस्वती मावीको खेल मैदानमा भएको उद्घाटन खेलमा बाहुनडाँगी फुटबल क्लबका तर्फबाट रिक्की प्रधान र श्याम मुर्मुको एक एक गोलको मद्दतमा बाहुण्डागीले विजयी शुरुवात गरेको हो ।

खेलको १७ औं मिनेटमा पहिलो गोल गर्दै बाहुनडाँगीका कप्तान समेत रहेका रिक्की प्रधानले टीमलाई अग्रता दिलाएका थिए । खेलको २९ औं मिनेटमा दोस्रो गोल गर्दै श्याम मुर्मुले अग्रता दोब्बर बनाए । बिपक्षी टीमका गोलरक्षक केही अघि बढेको मौकालाई सदुपयोग गर्दै प्रहार गरेको उनको गोलले जाली चुमेको थियो । खेलमा कचनकवलले गोल गर्नका लागि विभिन्न अवसर बनाए पनि गोल भने गर्न सकेन । खेलको म्यान अफ द म्याच बाहुनडाँगीका लागि पहिलो गोलकर्ता प्रधान घोषित भए । उनले ट्रफी र १५०० नगद प्राप्त गरे ।

प्रतियोगिता अनुसार शुक्रबारको खेल सनिश्चरे फुटबल क्लब भर्सेस रोलिङ क्लब धुलाबारी बीच हुनेछ । आजबाट शुरु भएको प्रतियोगिता २२ गतेसम्म संचालन हुनेछ । प्रतियोगिताको बिजेताले नगद १ लाख एक हजार र उपबिजेताले नगद ५१ हजारसहित ट्रफी, मेडल र प्रमाण पत्र प्राप्त गर्नेछन ।

बाहुनडाँगी जेसीजको आयोजनामा शुरु भएको प्रतियोगिताको उद्घाटन शत्रको प्रमुख अतिथी झापा गोल्ड्कपका अध्यक्ष बिनोद बस्नेत रहनु भएको थियो । उदघाटन मन्तव्य राख्दै प्रमुख अतिथि बस्नेतले खेल क्षेत्रको विकासका लागि बाहुनडाँगी जेसीजले चालेको यस कदमप्रती धन्यवाद ज्ञापन गर्नु भयो ।

प्रतियोगीताको उद्घाटन शत्रमा प्रमुख अतिथी बस्नेतसंगै सहिद परिवारका तर्फबाट नेत्रराज थापा क्षेत्री, बाहुनडाँगी जेसीजका संस्थापक अध्यक्ष नवीन बराल, मेचीनगर ४ का वडाअध्यक्ष अर्जुनकुमार कार्की लगायतले शुभकामना मन्तव्य राखेका थिए । बाहुनडाँगी जेसीजका अध्यक्ष देबु बानियाँको अध्यक्षतामा सम्पन्न कार्यक्रम महासचिव सुस्मिता खतिवडा भण्डारीको सञ्चालनमा सम्पन्न भएको थियो ।

प्रकाशित मिति: बिहीबार, चैत १५, २०८० १९:५४