अब नेपाली कागजातले भारतिय सिम लिन पाइने

बिदेश

गृहपृष्ठ
बिदेश

सेतोपत्र डेस्क मंगलबार, फागुन ८, २०८०

झापा, फागुन ८ । नेपाली कागजात देखाएर भारतिय सिम लिन मिल्ने भएको छ । अब नेपालीहरू भारत भ्रमणमा जाँदा अब सजिलै त्यहाँको सिम कार्ड खरिद गर्न पाउने भएका छन । भारत सरकारले सोमबार नेपाली र भुटानी नागरिकका लागि सजिलै सिम कार्ड खरिद गर्न सकिने व्यवस्था ल्याएको हो ।

भारतको सञ्चार मन्त्रालयले सूचना जारी गर्दै उक्त निर्णय सार्वजनिक गरेको हो । भारत भ्रमणमा जाँदा नेपालीले नागरिकता, भोटर कार्ड, पासपोर्टमध्ये कुनै एकबाट त्यहाँको सिम कार्ड खरिद गर्न पाउने भएका हुन । त्यस्तै भारतस्थित नेपाली दूतावासले जारी गरेको फोटोसहितको प्रमाणपत्रले पनि सिम कार्ड खरिद गर्न सकिनेछ । नेपालीहरूले सहजरूपमा सिम कार्ड पाउने भारत सरकारले निर्णय गरे पनि यसको कार्यान्वयनका लागि भने केही समय लाग्ने बताइएको छ ।

भारत भ्रमणमा गएका नेपालीले सिम कार्ड नपाउँदा सास्ती भोग्दै आएका थिए । सिम कार्ड नपाएर सास्ती भोग्न थालेपछि काठमाडौंस्थित भारतीय दूतावासमा नेपालीहरूले गुनासो टिपाएका थिए । दिनहुँ गुनासो आउन थालेपछि नेपालका लागि भारतीय राजदूत नविन श्रीवास्तवले नेपालीहरूका लागि सिम कार्ड वितरणमा सहजता प्रदान गर्न भारत सरकारसँग पहल गर्नु भएको थियो । राजदूत श्रीवास्तवको निरन्तर प्रयासपछि भारत सरकारले नेपाली र भुटानी नागरिकका लागि सिम कार्ड वितरणमा सहजता ल्याएको हो ।

यसअघि विदेशीहरूका लागि सिम कार्ड पाउन पासपोर्टमा भिसा स्ट्याम्पको आवश्यकता अनिवार्य रहेको थियो । आधार कार्ड नभएका र पासपोर्टमा भिसा नभएका विदेशीहरूले भारतीय सिम कार्ड नपाउने भएपछि त्यसको प्रत्यक्ष मारमा नेपाली र भुटानीहरू परेका छन ।

प्रकाशित मिति: मंगलबार, फागुन ८, २०८० ०७:२१