टिपरको ठक्करबाट दुइ दिनमा दुइ जनाको मृत्यु

स्थानीय

गृहपृष्ठ
स्थानीय

सेतोपत्र डेस्क बुधबार, असार ३, २०८३

एआइ बाट निर्मित तस्बिर

झापा,असार ३ । झापामा टिपरको ठक्करबाट दुइ दिनमा दुइ जनाको मृत्यु भएको छ । टिपरको ठक्करबाट आज बिहान दमकमा र हिजो बेलुका गौरादहमा एक/ एक जनाको ज्यान गएको हो ।

मृत्यु हुनेमा दमक ५ का ६० बर्षीय भिमबहादुर काकी र गौरादह ४ का ६१ बर्षीय प्रेम प्रसाद गुरागाँई रहेको जिल्ला प्रहरी कार्यलय झापाले जनाएको छ ।

आज बिहान ९.५५ बजेतिर पूर्व पश्चिम राजमार्गमा दमकबाट उर्लाबारीतर्फ जाँदै गरेको मे ११ प १६२० नं को स्कुटीलाई टिपरले ठक्कर दिएको थियो। स्कुटीमा सवार दमक ५ का भिमबहादुर कार्की गंभीर घाइते भएकोमा उपचारका लागि दमक अस्पताल लगिएकोमा अस्पताल पुर्याउनेबित्तिकै चिकित्सकले मृत घोषणा गरेका थिए । ठक्कर दिएर फरार भएको प्र.१–०२–००१ क ४२८५ नम्बरको टिपर र टिपर चालक गौरादह वडा न.०९ बैगुनधुरा बस्ने २९ वर्षीय दिपक प्रधानलाई दमक प्रहरीले नियन्त्रणमा लिएको छ ।

त्यसअघि हिजो बेलुका ८ः२० बजे गौरादह १ नवदुर्गा पेट्रोल पम्पस्थित पाडाजुँगी– गौरीगंज भित्री सडक खण्डमा डिपुचोकबाट पेट्रोल पम्पतर्फ जाँदै गरेको प्र.न.१–०१–००१ क ११८८ नम्बरको टिपरले साइकल यात्री गौरादह ४ बस्ने ६१ वर्षीय प्रेमप्रसाद गुरागाईलाई ठक्कर दिएको थियो । टाउको र शरीरको बिभिन्न भागमा चोट लागेका गम्भीर घाइते गुरागाईलाई उपचारको लागि दमक अस्पताल दमक पठाइएकोमा उपचारको क्रममा राति ८ः४५ बजे डाक्टरले मृत घोषणा गरेका थिए । टिपर चालक गौरादह १ बस्ने ३५ वर्षीय उमेश ताजपुरीया र टिपर नियन्त्रणमा लिएको जिल्ला प्रहरी कार्यालयले जनाएको छ ।

प्रकाशित मिति: बुधबार, असार ३, २०८३ १५:२१