वर्षाको प्रभाव: इलाममा एकको मृत्यु,झापामा पुल बगायो

स्थानीय

गृहपृष्ठ
स्थानीय

सेतोपत्र डेस्क बुधबार, साउन २८, २०८२

इलाममा खसेको पहिरो / बाढीले बगाएको बिरिङ पुल

साउन २८,झापा । हिजो रातीबाट भएको वर्षाले इलाम र झापामा क्षति पुर्याएको छ। बर्षा पछि आएको पहिरोमा परि इलाममा एक जनाको मृत्यु भएको छ भने झापामा पुल बाढीले बगाएको छ ।

आज मध्यान्ह इलामको रोङ गाउँपालिका–४ मानाबुङमा ६० वर्षीय बिरबहादुर राईको पहिरोमा पुरिएर ज्यान गएको छ । राईलाई घरबाट करिब ३०० मिटर पश्चिमतर्फको बाटोमा पैदल हिँडिरहेका बेला खोल्सातर्फ आएको लेदो–पहिरोले पुरेको प्रहरीले जनाएको छ । प्रहरी चौकी किटेनी र इलाका प्रहरी कार्यालय पशुपतिनगरको टोलीले घटनास्थल सुरक्षित राखी आवश्यक कानुनी प्रक्रिया अघि बढाएको छ।

पहिरोले मेची राजमार्गका विभिन्न स्थानमा लेदो थुप्रिँदा सवारी साधन चल्न समस्या भइरहेको छ । इलाम नगरपालिका ११, सोयाकमा केचना–कञ्चनजंघा मार्गमा पहिरो झर्दा सवारी साधन चल्न बन्द भएका छन् । फाकफोकथुम गाउँपालिका–१, पचेवास्थित आमचोकदेखि घुर्बिसे पञ्चमी हुँदै राँके इलाम आउने भित्री कच्ची सडक अवरुद्ध छ । लेदोसहितको पहिरो झरी सडक पूर्ण रूपमा अवरुद्ध भएको हो ।माई नगरपालिका ९, सोक्तिमस्थित इलाम–बिर्तामोड भित्री सडक खण्डमा रुखसहित पहिरो झरेपछि बाटो अवरोध भएको छ ।

यता झापाको अर्जुनधारा–७ स्थित बिरिङ खोलाको पक्की पुल आज दिउँसो बाढीले बगाएको छ । बर्षा पछि मध्यान्ह १२ः३० बजे तिर बाढीले करिब २०–२५ मिटर भाग बगाएको हो । यो पुल दुई वर्षअघि २०८० साउन २९ गते वर्षाकै कारण भासिएको थियो। गत जेठ १३ गतेदेखि नै सवारी आवागमन बन्द गरिएको यो पुल अवरुद्ध भएपछि शनिश्चरे–मिलडाँडा वैकल्पिक बाटो प्रयोगमा आएको इलाका प्रहरी कार्यालय बिर्तामोडले जनाएको छ।

प्रकाशित मिति: बुधबार, साउन २८, २०८२ १५:५६