के हो विश्वप्रकाशले प्रस्ताव गरेको “विनर्स टेक अल थ्योरी” (भिडियो सहित)

राजनिति

गृहपृष्ठ
राजनिति

के हो विश्वप्रकाशले प्रस्ताव गरेको “विनर्स टेक अल थ्योरी” (भिडियो सहित)

सेतोपत्र डेस्क मंगलबार, माघ १, २०८१

झापा, माघ १ । नेपाली काँग्रेसका महामन्त्री विश्वप्रकाश शर्माले संविधान संशोधनका लागि नयाँ प्रस्ताव गर्नु भएको छ । वहाँले एउटै प्रधानमन्त्री पाँच बर्ष टिक्न सक्ने बनाउन संविधानमै व्यवस्था गरेर जानु पर्ने भन्दै ‘विनर्स टेक अल थ्योरी’ को प्रस्ताव गर्नु भएको छ । आफ्नै गृहनगर झापाको धुलाबारीमा सोमबार पत्रकारहरुसंगको कुराकानीका क्रममा ‘विनर्स टेक अल थ्योरी’ का बारेमा महामन्त्री शर्माले प्रष्ट पार्नु भएको थियो । ‘विनर्स टेक अल थ्योरी’ अर्थात जित्नेले सबै लिने भन्ने सिद्धान्त अनुसार नेपालले एउटा प्रधानमन्त्री पाँच बर्षसम्म टिक्ने व्यवस्था गर्न सकिने र यसले लोकतान्त्रिक गणतन्त्रको मर्मलाई समेत नबिगार्ने शर्माले बताउनु भयो ।

प्रतिनिधि सभा सदस्य समेत रहनु भएका शर्माका अनुसार प्रत्यक्ष र समानुपातिकमा पाएको मतको आधारमा पहिलो हुने राजनितिक दलको संसदीय दलको नेतालाई पाँच बर्ष प्रधानमन्त्री बनाउने व्यवस्था गर्नु पर्छ । शर्माका अनुसार प्रत्यक्ष र समानुपातिकमा पाएका मतका आधारमा पहिलो हुने दल छान्ने, त्यसबाट प्रत्यक्षमा र समानुपातिकमा प्राप्त सिट संख्यामा सामान्य बहुमत नपुगेको संख्यालाई ‘विनर्स टेक अल थ्योरी’ का आधारमा बाँकी सिट पनि समानुपातिकबाट सोही दलले लिन पाउने । तर सामानुपातिकमा सांसद हुने व्यक्तिहरु विभिन्न क्षेत्रका विज्ञहरु रहने गरी सूची पहिला नै सार्वजनिक गरेको हुनु पर्ने शर्माको प्रस्ताव छ ।

त्यसो गरे पछि पहिलो हुने दलको संसदीय दलका नेता पहिलो दुई बर्षका लागि प्रधानमन्त्री हुन्छन । सपथ ग्रहण गरेको दुई बर्ष पुगेर एक महिना भित्र प्रधानमन्त्रीले आफ्नो दलमा गएर विश्वासको मत लिनु पर्ने हुन्छ । प्रधानमन्त्रीको विश्वासको मतका लागि विभिन्न इण्डीकेटरहरु राखेर ती इण्डीकेटरहरुमा उतीर्ण भए मात्रै विश्वासको मत दिने नत्र सोही दलले अर्को सांसद प्रधानमन्त्रीका लागि अगाडी सार्ने व्यवस्था संविधानमा नै गर्नु पर्ने काँग्रेस महामन्त्री शर्माको प्रस्ताव छ ।

यस्तो व्यवस्था गर्दा प्रधानमन्त्रीले आफुलाई दिएको इण्डीकेटरहरुमा उतिर्ण हुने गरी काम गर्ने भएकाले त्यसले देश विकासमा गति लिने शर्माले बताउनु भयो । त्यस बाहेक चुनावमा हारेकाहरु समानुपातिक सूचीबाट सांसद बन्ने बाटो बन्द हुने र बिषय विज्ञहरु सांसदका रुपमा सहभागि हुने भएकाले देशको निति निर्माणमा त्यसले सकारात्मक प्रभाव पार्ने शर्माको भनाई छ ।