कोशी प्रदेशको बजेटः ३६ अर्ब ७४ करोड ३५ लाख रुपैयाँ

देश

गृहपृष्ठ
देश

सेतोपत्र डेस्क आइतबार, मंसिर १०, २०८०

झापा, मंसिर १० । कोशी प्रदेश सरकारले ३६ अर्ब ७४ करोड ३५ लाख रुपैयाँको बजेट अध्यादेश प्रतिस्थापन विधेयक प्रदेश सभामा पेस गरेको छ । शनिबार मुख्यमन्त्री केदार कार्कीले विधेयक प्रदेश सभामा पेस गर्नु भएको हो । मुख्यमन्त्री कार्कीले प्रदेश सरकारमा रहेका दलहरुको सहमतिमा बजेट ल्याएको बताउनुभयो । उहाँले यसअघि दुई पटक अध्यादेशबाट स्वीकृत भएको बजेटको आकारमा धेरै परिवर्तन नगरिएको बताउनुभयो । उहाँले भन्नुभयो, ‘यस बजेटलाई हामीले धेरै चलाउने अवस्था थिएन।

सरकार बनाउन साथ दिएको नेकपा एमाले, नेकपा माओवादी र एकीकृत समाजवादीको समर्थन र सहयोगमा बजेट आएको छ । सबैको सहमतिमा बजेट ल्याउँदा धेरै आकार बढाउनेतर्फ समय खर्चिएनौँ ।’ मुख्यमन्त्री कार्कीले प्रदेशको चालु आर्थिक वर्षको लागि ३६ अर्ब ७४ करोड ३५ लाख १० हजार रुपैयाँ विनियोजन गरेको जानकारी दिनुभयो । उहाँले कुल विनियोजनमध्ये चालु खर्च १२ अर्ब ६८ करोड १० लाख ८३ हजार, पूँजीगत खर्च २० अर्ब ३८ करोड १५ लाख ८२ हजार, वित्तीयतर्फ १ करोड र स्थानीय तहमा वित्तीय हस्तान्तरणतर्फ ३ अर्ब ६६ करोड ७३ लाख ४५ हजार रुपैयाँ रहेको बताउनुभयो । जसमा चालु खर्चतर्फ संघीय अनुदान बचत फिर्ता २ अर्ब रुपैयाँ रहेको छ ।

प्रदेश सरकारले बजेटका लागि खर्च व्यहोर्ने स्रोतमध्ये प्रदेश सरकारको आन्तरिक राजश्वबाट ४ अर्ब ५७ करोड ७८ लाख ५० हजार, राजश्व बाँडफाँटबाट ११ अर्ब ६४ करोड ८१ लाख, संघबाट प्राप्त हुने वित्तीय समानीकरण अनुदानबाट ८ अर्ब ७८ करोड ३८ लाख, ससर्त अनुदानबाट ५ अर्ब ८४ करोड ३२ लाख, समपूरक अनुदानबाट ७३ करोड र विशेष अनुदानबाट ७६ करोड गरी राजश्व तथा वित्तीय हस्तान्तरणबाट ३२ अर्ब ८४ करोड २९ लाख ५० हजार रुपैयाँ रहेको छ । त्यसैगरी, बाँकी अपुग रकम नगद मौज्दातबाट ४ अर्ब २५ करोड १ लाख तथा वैदेशिक अनुदानबाट १५ करोड ४ लाख ६० हजार व्यहोरिने भएको छ । प्रदेश सभा बैठक आइतबार पुनः बस्ने भएको छ ।

प्रकाशित मिति: आइतबार, मंसिर १०, २०८० ०७:१८