केपी ओली झापा जाँदा अब मलाई सोधेर मात्रै जानु पर्छः दुर्गा प्रसाई

राजनिति

गृहपृष्ठ
राजनिति

सेतोपत्र डेस्क बिहीबार, मंसिर ७, २०८०

बिहिबार बिहान सञ्चारकर्मीसंग बोल्दै प्रसाई ।

काठमाण्डौ मंसिर ७ । मेडिकल व्यवशायी तथा अभियन्ता दुर्गा प्रसाईले नेकपा एमालेका अध्यक्ष केपी शर्मा ओलीले अब झापा आउँदा आफुलाई सोधेर मात्रै आउनु पर्ने बताउनु भएको छ । राष्ट्र, राष्ट्रियता, धर्म, संस्कृति र नागरिक बचाउ महाअभियानको काठमाण्डौ केन्द्रीत प्रर्दशनका बारेमा आज बिहानै सञ्चारकर्मीसंग कुरा गर्दै प्रसाईले भन्नुभयो, ‘केपी ओलीले अब झापामा मुख देखाउँन सक्छन ? झापा त नजाँदा हुँन्छ अब । मलाई नसोधी झापा नजादाँ हुन्छ अब ।’ झापा जाँदा ओलीले अब आफुसंग अनुमति लिनु पर्ने प्रसाईले दाबी गर्नु भयो ।

‘केपी ओलीले झापा जाँदा पुलिससगं परमिशन लिएर हुँदैन,’ प्रसाईले भन्नुभयो, ‘मसंग परमिशन लिनु पर्छ ।’ झापा बिर्तामोडस्थीत बिएण्डसी अस्पतालका सञ्चालक रहनु भएका प्रसाईले भन्नुभयो, ‘अब महेश बस्नेतलाई पनि मलाई नसोधी भक्तपुर छिर्न नसक्ने बनाउँछु ।’ प्रसाईले राजसंस्था र हिन्दु राज्यका बारेमा जनमत संग्रह गरेर देखाउन राजनितिक दलहरुलाई चुनौति दिनु भयो । ‘जनमत संग्रह गरेर देखाउन न उनीहरुको एक मत आउँछ, मेरो ९९ मत आउँछ,’ प्रसाईले भन्नुभयो ।

बिहानै देखि प्रसाईको भक्तपुरस्थीत घरमा प्रदर्शनका लागि देशका विभिन्न जिल्लाबाट आएकाहरुको भिड लागेको छ भने सुरक्षाकर्मीको बाक्लो उपस्थिति रहेको छ । प्रसाईको नेतृत्वमा आज काठमाण्डौमा प्रर्दशन हुँदैछ । बल्खुलाई कार्यक्रम स्थल तोकिएको भए पनि प्रसाई नेतृत्वको समूहले आज काठमाण्डौका विभिन्न ८ ठाउँबाट प्रर्दशन गर्ने तयारी गरेको छ ।

प्रकाशित मिति: बिहीबार, मंसिर ७, २०८० ०९:१०