मेचीनगरः बजेट तर्जुमा मार्ग दर्शन पारित, वडा बजेट सिलिङ ६० लाख

स्थानीय

गृहपृष्ठ
स्थानीय

सेतोपत्र डेस्क मंगलबार, वैशाख २९, २०८३

इटाभट्टा, बैशाख २९ । झापाको मेचीनगर नगरपालिकाले आगामी आर्थिक बर्ष २०८३/०८४ को बजेटको तयारी सुरु गरेको छ । नगरकार्यपालिकाको बैशाख १५ गते बसेको बैठकले बजेट तर्जुमा मार्ग दर्शन पारित गरेसंगै बजेटको तयारी सुरु भएको हो ।

नगर कार्यपालिका बैठकले पारित गरेको मार्गदर्शनले आगामी बजेटको शीर्षकदेखि सिलिङसम्म निर्धारण गरेको छ । बजेटलाई वडास्तरिय र नगरस्तरिय गरी दुई भागमा विभाजन गरी कार्यान्वयन गर्ने मार्ग दर्शनमा उल्लेख गरिएको छ ।

आगामी आर्थिक बर्ष २०८३/०८४ मा मेचीनगरको वडास्तरिय बजेटको सिलिङ ६० हुने गरी मार्ग दर्शनले तोकेको छ । अब वडास्तरिय बजेट ६० लाख भित्र राखेर वडाले योजना सिफारिस गर्नु पर्नेछ । सुत्रका आधारमा गरिने योजनामा वडालाई ६ करोड रकम बिनियोजन गरिने भएको छ ।

वडास्तरिय एउटा नयाँ योजनाको बजेट न्यूनतम ५ लाख हुुनु पर्नेछ छ भने नगरस्तरिय एउटा नयाँ योजनाको बजेट न्यूनतम १० लाख हुनु पर्ने मार्ग दर्शनमा उल्लेख गरिएको छ । तर मर्मतसम्भार, विपद पूर्व तयारी, सिंचाई, खानेपानी र टोलस्तरिय योजनाको हकमा न्यूनतम बजेट सिलिङको दायरा लागू नहुने बताइएको छ ।

वडाले योजना सिफारिस गर्दा पुराना काम भइरहेका योजना सम्पन्न गर्ने गरी प्राथमिकतामा राखेर बजेट प्रस्ताव गर्नु पर्नेछ भने प्राथमिकता निर्धारणलाई समेत एक, दुई र तीन गरी छुट्याउनु पर्ने मार्ग दर्शनमा उल्लेख छ ।

प्रकाशित मिति: मंगलबार, वैशाख २९, २०८३ ०९:१७