तेराख प्रतिष्ठानद्वारा एक लाख ४४ हजार राशीको पुरस्कार र सम्मान प्रदान

कला/साहित्य

गृहपृष्ठ
कला/साहित्य

सेतोपत्र डेस्क शनिबार, वैशाख १२, २०८३

धुलाबारी, बैशाख १२ । साहित्यकार तेराख प्रतिष्ठानद्वारा एक लाख ४४ हजार नगद राशीसहित विभिन्न व्यक्ति तथा संस्थालाई सम्मान र पुरस्कृत गरेको छ । आज प्रतिष्ठानको आठौं वार्षिक उत्सव समारोहकाबीच तेराख महाकवि देवकोटा साहित्य सम्मान २०८२ बाट एक स्रष्ठा र एक संस्थालाई सम्मानित गरिएको छ ।

झापाली अग्रज साहित्यकार चुडामणी बशिष्ठलाई नगद ५१ हजार र सम्मान पत्र सहित कार्यक्रमका प्रमुख अतिथि राष्ट्रिय सभा सदस्य गोपालकुमार बस्नेतले तेराख महाकवि देवकोटा साहित्य सम्मान २०८२ सम्मान गर्नु भएको थियो । त्यस्तै भारतको साहित्यिक संस्था लैनसिङ वाङदेल साहित्य कला प्रतिष्ठानलाई समेत तेराख महाकवि देवकोटा साहित्य सम्मानबाट सम्मानित गरिएको थियो । सम्मानित संस्थाका उपाध्यक्षसहितको समूहलाई प्रमुख अतिथि बस्नेतले नगद ५१ हजार र सम्मान पत्र प्रदान गर्नु भएको थियो ।

मेचीनगर १० स्थीत धुलाबारी माविको सभाहलमा सम्पन्न वार्षिक उत्सव कार्यक्रमकैबीच प्रतिष्ठानले प्रदान गर्दै आएको मधुसुदन उत्कृष्ट कृषक सम्मान २०८२ बाट रोङ गाउँपालिका वडा नं. ६ इलामका कृषक भीमबहादुर क्याप्छाकीलाई नगद २१ हजार र सम्मान पत्रले सम्मानित गरिएको थियो भने पदमादेवी उत्कृष्ट छात्रा पुरस्कार २०८२ बाट धुलाबारी माविकी छात्रा सञ्जु नेपाललाई सम्मान गरिएको थियो । नेपाललाई नगद २१ हजार र सम्मान पत्रले पुरस्कृत गरिएको थियो । सम्मानित र पुरस्कृत सबैलाई साहित्यकार पुण्य प्रसाद खरेलले दोसल्ला ओडाउनु भएको थियो ।

प्रतिष्ठानका अध्यक्ष शिवकुमार पौडेलको सभापत्विमा सम्पन्न वार्षिक उत्सव कार्यक्रममा प्रमुख अतिथि बस्नेत, पुरस्कृत स्रष्टा चुडामणी बशिष्ठ, अग्रज पत्रकार चन्द्र भण्डारीलगायतले शुभकामना मन्तव्य राख्नु भएको थियो ।

कार्यक्रममा प्रतिष्ठानका संरक्षक लेखनाथ खतिवडाले संस्थाका बारेमा स्पष्ट पार्नु भएको थियो भने शुशिला खतिवडा र देबीचरण भण्डारीले सम्मानित र पुरस्कृतहरुको बारेमा परिचय गराउनु भएको थियो । प्रतिष्ठानका सचिव जय भण्डारी र सदस्य मुना रानाको सञ्चालन रहेको कार्यक्रममा प्रतिष्ठानकी उपाध्यक्ष लिना भण्डारीले स्वागत मन्तव्य राख्नु भएको थियो ।