झापा–१ : एमालेका दुई जनप्रतिनिधि नै रास्वपा प्रवेश

राजनिति

गृहपृष्ठ
राजनिति

सेतोपत्र डेस्क शुक्रबार, माघ ९, २०८२

न्यौपाने र हुमागाईलाई पार्टी प्रवेश गराउँदै झापा १ मा रास्वपा उम्मेद्वार डाँगी ।

मेचीनगर, माघ ९ । नेकपा एमालेबाट स्थानीय तहमा निर्वाचित दुई जना जनप्रतिनिधि नै रास्वपामा प्रवेश गरेका छन । झापाको मेचीनगर नगरपालिका वडा नं. १ का वडा सदस्यद्वय शान्त प्रसाद न्यौपाने र चेतन हुमागाई बिहिबार औपचारिक रुपमा रास्वपामा प्रवेश गर्नु भएको रास्वपा क्षेत्रीय संयोजक असिम दाहालले जानकारी दिनुभयो । न्यौपाने र हुमागाई २०७९ को स्थानीय तह निर्वाचनमा नेकपा एमालेका तर्फबाट मेचीनगर १ को निर्वाचित वडा सदस्य हुनुहुन्छ ।

रास्वपाले मेचीनगर १ को हिलेधापस्थीत ४९ धारा क्षेत्रमा राखेको मतदाता भेटघाट कार्यक्रमकाबीच रास्वपाबाट झापा १ मा उम्मेद्वार रहनु भएको निशा डाँगीले न्यौपाने र हुमागाईलाई रास्वपाको चुनाव चिन्ह घण्टीको व्याज लगाएर पार्टी प्रवेश गराउनु भएको थियो ।

‘४० बर्ष एमालेमा काम गरियो तर अब एमालेमा कुरा मिल्न छोड्यो,’ सेतोपत्रसंग कुरा गर्दै न्यौपानेले भन्नुभयो । संकटका बेला आफुले विश्वास गरेको पार्टीले साथ नदिएकाले एमाले छोडेको हुमागाईको भनाई छ । ‘३२ बर्ष एमालेको झोला बोकियो तर संकट आइपरेको बेला नेतृत्वले साथ दिएन,’ हुमागाईले भन्नुभयो, ‘ठुलै संकट आइलागेको बेला पार्टी नेतृत्वले आड भरोसा दिएन र लगातार खेद्ने काम मात्रै गर्यो त्यसैले एमाले परित्याग गरें ।’ यस अघि मेचीनगर ३ बाट निर्वाचित वडा सदस्य बिशोर भट्टराईले पनि एमाले परित्याग गरेको घोषणा गरिसक्नु भएको छ ।

प्रकाशित मिति: शुक्रबार, माघ ९, २०८२ ०८:३५