रास्वपाले झापाका उम्मेद्वार टुङगायो, १ नम्बरमा निशा डाँगी

राजनिति

गृहपृष्ठ
राजनिति

सेतोपत्र डेस्क आइतबार, माघ ४, २०८२

रास्वपाबाट झापा १ की उम्मेद्वार डाँगी ।

झापा, माघ ४ । राष्ट्रिय स्वतन्त्र पार्टी (रास्वपा)ले झापाका सबै उम्मेद्वार टुङ्गो लगाएको छ । फागुन २१ को प्रतिनिधि सभा निर्वाचनका लागि झापाका पाँच वटै क्षेत्रका उम्मेद्वार आज टुङ्गो लगाएको हो ।

झापाको क्षेत्र नं १ मा निशा डाँगी उम्मेदवार बनाउने रास्वपाले निर्णय गरेको छ । `झापा १ मा पार्टीले मलाई उम्मेद्वार बनाउने निर्णय भएको छ,´ डाँगीले सेतोपत्रसंग भन्नुभयो । अघिल्लो पटक समानुपातिकबाट संसद प्रवेश गर्नु भएकी डाँगी सबैभन्दा कान्छी सांसद हुनुहुन्थ्यो ।

रास्वपास्रोतका अनुसार झापा क्षेत्र नम्बर २ मा पूर्व उपसभामुख इन्दिरा राना मगरलाई रास्वपाले उम्मेदवार बनाएको छ। यस क्षेत्रमा नेकपा एमालेबाट निवर्तमान सभामुख देवराज घिमिरेले टिकट पाउनु भएको छ। यस क्षेत्रमा निवर्तमान सभामुख र उपसभामुखबीच प्रतिस्पर्धा हुने भएको हो।

त्यस्तै क्षेत्र नम्बर ३ मा पार्टी जिल्ला सभापति प्रकाश पाठक उम्मेदवार बन्ने निश्चित भएको छ भने क्षेत्र नम्बर ४ मा पार्टी सचिव शम्भु सुस्केरा उम्मेदवार बन्ने टुंगो लागेको छ।

बहुचर्चित क्षेत्रका रूपमा रहेको झापा क्षेत्र नम्बर ५ मा भने काठमाडौं महानगरपालिकाका निवर्तमान प्रमुख बालेन्द्र शाह उम्मेद्वार हुने निश्चीत भएको छ । झापा ५ मा नेकपा एमालेबाट अध्यक्ष केपी शर्मा ओली चुनावी मैदानमा रहनु हुनेछ भने नेपाली कम्युनिष्ट पार्टीबाट युवा नेता रञ्जित तामाङ उम्मेद्वार हुनु हुने भएको छ ।

प्रकाशित मिति: आइतबार, माघ ४, २०८२ २०:१७