झापामा एचआइभी सङ्क्रमितको मृत्यु दर बढ्दो

देश

गृहपृष्ठ
देश

सेतोपत्र डेस्क सोमबार, मंसिर २२, २०८२

झापा,मसिंर २२ । झापामा पछिल्लो तीन वर्षमा एचआइभी सङ्क्रमितको मृत्यु दर बढेको छ । तीन बर्षमा ७५ जना एचआइभी सङ्क्रमितको मृत्यु भएको स्वास्थ्य कार्यालय झापाले जनाएको छ ।

कार्यलयका फोकल पर्सन वीरेन्द्र दासले तीन वर्षयता एचआइभी सङ्क्रमितको मृत्युदर वृद्धि हुँदै गएको जानकारी दिनुभयो ।आर्थिक वर्ष २०७९\८० मा १७ जना, २०८०\८१ मा २३ जना र आव २०८१\८२ मा ३५ जनाको मृत्यु भएको उहाँको भनाई छ । उपचारमा आउने बिरामीमा औषधि नखाने दर शून्यमा झरेको भएता पनि मृत्युदर भने बढेको उहाँले बताउनुभयो ।

चालू आर्थिक वर्षको साउनदेखि कात्तिक मसान्तसम्ममा २२ जना नयाँ एचआइभी सङ्क्रमित फेला परेका छन् । नयाँ एचआइभी सङ्क्रमितमध्ये चार जनाले दमक अस्पताल दमक र १८ जनाले मेची प्रादेशिक अस्पतालबाट नियमित एआरटी औषधि सेवन गरिरहेका छन् ।

झापामा हालसम्म नयाँ तथा पुराना गरी ८०६ जना एचआइभी सङ्क्रमितले नियमित एआरटी सेवा लिइरहेको फोकल पर्सन दासले बताउनुभयो । कूल एचआइभी सङ्क्रमितमध्ये १८ वर्षमुनिका ३० जना बालबालिका रहेको र उनीहरु सबैले एआरटी सेवा लिँदै आइरहेको उहाँले जानकारी दिनुभयो ।

प्रकाशित मिति: सोमबार, मंसिर २२, २०८२ १६:२०