कुकुरलाई रेडियो कलर र भ्याक्सिन लगाएर कुकुर तिहार मनाउँदै मेचीनगर रोटरी

स्थानीय

गृहपृष्ठ
स्थानीय

सेतोपत्र डेस्क आइतबार, कात्तिक २, २०८२

धुलाबारी, कार्तिक २ । झापाको मेचीनगरमा यस बर्षको कुकुर तिहारको अवसरमा भोलि सोमवार बिषेश कार्यक्रमको आयोजना गरिने भएको छ । रोटरी क्लव अफ मेचीनगर र रोट्याक्ट क्लव मेचीनगरको आयोजनामा हुन लागिरहेको कार्यक्रम अन्तर्गत कुकुर तिहारको दिन कार्तिक ३ गते सोमवार सामुदायिक कुकुरहरुलाई दुर्घट्नाबाट बचाउन रेडियो कलर(चम्किलो फित्ता) लगाउने सहितका कार्यक्रम सहित कुकुर तिहारमा बिषेश कार्यक्रम गर्न लागिएको अध्यक्ष शर्मिला पाठकले बताउनु भयो ।

घरबिहिन कुकुरहरुलाई रेडियो कलर (चम्किलो फित्ता) लगाउने, रेविज तथा छाला सम्बन्धी रोगको भ्याक्सिन लगाउने र खानेकुरा खुवाउने लगायतका कार्यक्रम राखिएको रोटरी क्लव अफ मेचीनगरकी अध्यक्ष पाठकले बताउनु भयो ।

परापुर्वकालदेखि नै मानिसको अत्यन्तै नजिक रहेर पनि कुकुर अहिलेसम्म पनि मानिसबाटै हेपिएका कारण त्यस्तो सोचलाई बदल्न गतबर्षदेखि कुकुर तिहारका दिन सामुदायिक कुकुरहरुलाई सम्मान जनाउने कार्यक्रम सुरु गरिएकोमा यो बर्ष पनि त्यसकै निरन्तरताका रुपमा कार्यक्रम गर्न लागिएको अध्यक्ष पाठकले जानकारी दिनुभयो ।

मानिसको साथीको रुपमा कुकुरको पहिचानलाई स्थापित गर्न सोमवार विहान मेचीनगरको धुलाबारी चोकमा विहान ७ बजे भेला भएर पशु प्राविधिक सहितको दुई समूहले धुलाबारीदेखि काकरभिट्टासम्म र धुलाबारीदेखि चारआलीसम्म मुख्य सडकमा भेटिने सामुदायिक कुकुरहरुलाई रेडियो कलर लगाउने, खाना खुवाउने र भ्याक्सिन लगाउने रोट्याक्ट क्लव अफ मेचीनगरका कोषाध्यक्ष तथा कार्यक्रम संयोजक शिशिर भट्टराईले बताउनु भयो ।

मानिसको सुख दुखको साथी मात्रै नभएर सुरक्षाका लागि बलियो पहरेदार पनि भएकाले सबै कुकुरहरुको सम्मानका लागि कार्यक्रम आयोजना गरिएको कार्यक्रमका अर्का संयोजक आयुष्मान निरौलाले बताउनु भयो । कुकर तिहार सम्बन्धी बिषेश कार्यक्रम सञ्चालन गर्न मेचीनगर कृषि तथा पशु स्वास्थ्य प्राविधिक समूहले प्राविधिक सहयोग गरिरहेको संयोजक भट्टराईले बताउनु भयो ।

प्रकाशित मिति: आइतबार, कात्तिक २, २०८२ १५:०८