लम्पी स्किन संक्रमणः एक सातामा झापामा ९१ पशु मरे

स्थानीय

गृहपृष्ठ
स्थानीय

सेतोपत्र डेस्क सोमबार, असार ३०, २०८२

झापा, असार ३० । लम्पी स्किन संक्रमणका कारण झापामा एक सातामा ९१ वटा पशु मरेका छन । जिल्लामा एक महिना अघिदेखि फैलिएको लम्पी स्किनको संक्रमण अझै नियन्त्रणमा आउन सकेको छैन । जिल्लाका १५ वटै पालिकामा लम्पी स्किनको संक्रमण फैलिरहँदा हालसम्म ११ हजार ६०६ वटा पशु चौपाया संक्रमित भएका छन । हालसम्म झापामा यस रोगका कारण २३६ वटा गाईगोरु र भैसी मरेको भेटेरिनरी अस्पताल तथा पशु सेवा विज्ञ केन्द्र झापाले जनाएको छ । यसअघि १४५ वटा पशु चौपाया मरेकोमा यो साता मात्रै ९१ वटा पशु चौपाया मरेका छन । यसअघि १० हजार ९२ वटा चौपाया प्रभावित भएका थिए भने यो साता २ हजार १४३ वटा चौपाया प्रभावित भएका छन ।

जिल्लाका मेचीनगर नगरपालिका र बाह्रदशी गाउँपालिकामा संक्रमण धेरै देखिएको छ । गौरादह र दमक नगरपालिका तथा हल्दिवारी गाउँपालिकामा लम्पि स्किनको संक्रमण तुलनात्मक रुपमा कम देखिएको भेटेरिनरी अस्पताल तथा पशु सेवा विज्ञ केन्द्र झापाले जनाएको छ । लम्पी स्किनबाट गाईगोरुसंगै भैसी र राँगा पनि प्रभावित भएका छन । अहिलेसम्म दुईवटा भैसी र राँगामा लम्पी स्किन देखिएको छ ।

पशु सेवा विज्ञ केन्द्र झापाकी कार्यालय प्रमुख शीतल भट्टराईले लम्पी स्किनविरुद्धको भ्याक्सिन लगाउने कार्य जारी रहेको बताउनु भएको छ । वहाँले अहिलेसम्म ८७ हजार २६५ वटा पशुलाई भ्याक्सिन लगाइएको जानकारी दिनुभयो ।

दुई वर्षअघि झापामा लम्पी स्किन रोगले महामारीकै रूप लिएको थियो । त्यसबेला ३५ हजार एक सयभन्दा धेरै गाईभैंसीमा लम्पी स्किन संक्रमण देखिएको थियो भने ४ हजार ६ सय ८५ पशुको मृत्यु भएको थियो ।

प्रकाशित मिति: सोमबार, असार ३०, २०८२ ०७:३७