यी हुन मेचीनगरका इन्धन बापत बढी सुविधा लिने १३ जनप्रतिनिधि (विवरण सहित)

स्थानीय

गृहपृष्ठ
स्थानीय

सेतोपत्र डेस्क मंगलबार, असार १०, २०८२

झापा, असार १० । झापाको मेचीनगर नगरपालिकाका तीन जना वडा अध्यक्ष सहित १३ जना जनप्रतिनिधिले इन्धन बापतको बढी सुविधा लिएको पाइएको छ । गत आर्थिक बर्ष २०८०/०८१ मा मेचीनगरका वडा नं. २ का वडा अध्यक्ष दिपक बराल, वडा नं. ५ का वडा अध्यक्ष कनक बहादुर कार्की र मेचीनगर ७ का वडा अध्यक्ष प्रल्हादमणी ओलीसहित १३ जना जनप्रतिनिधिबाट इन्धन बापत बढी सुविधा लिएको रकम ३ लाख दुई हजार ८२२ रुपैयाँ असुल गर्नु पर्ने महालेखाले औंल्याएको छ ।

महालेखा परीक्षक कार्यालयको लेखा परिक्षण प्रतिवेदन अनुसार वडा अध्यक्ष बरालले ५१ हजार ११० रुपैयाँ, वडा अध्यक्ष कार्कीले ३ हजार ३२० रुपैयाँ र वडा अध्यक्ष ओलीले दुई हजार ४९० रुपैयाँ इन्धन बापत बढी सुविधा लिएकाले फिर्ता गर्नु पर्ने देखिएको छ ।

सबैभन्दा बढी कार्यपालिका सदस्य चित्रकुमार धिमालले ६५ हजार ५७० रुपैयाँ इन्धनको बढी सुविधा लिएकाले फिर्ता गर्नु पर्ने भएको छ । त्यस्तै माया प्याकुरेलले १८ हजार २६०, कुन्दन निरौलाले २२ हजार ४१०, अमित राईले ३८ हजार १४२, रिता परियारले १४ हजार ९४०, तिलजा देवानले १९ हजार ९२०, हरी बहादुर न्यौपानेले २४ हजार ९००, ह्रदय राजबंशीले २४ हजार ९००, अन्जु थापाले १४ हजार ९४० र कविता खनाल मिजारले १९ हजार ९२० रुपैयाँ पेट्रोल र डिजलबापत बढी रकम भुक्तानी लिएकाले असुल गर्नु पर्ने महालेखाले जनाएको छ ।