७ वर्षपछि अघि बढ्ने भयो जीपी सभागृह निर्माण

स्थानीय

गृहपृष्ठ
स्थानीय

सेतोपत्र डेस्क शुक्रबार, जेठ २३, २०८२

झापा,जेठ २३ । झापाको चन्द्रगढीस्थित गिरिजाप्रसाद कोइराला स्मृति सभागृह (जीपी भवन) को निर्माण कार्य ७ वर्षपछि पुनः सुरु हुने भएको छ। सहरी विकास मन्त्रालयले भवन निर्माणका लागि ३ करोड रुपैयाँ बजेट विनियोजन गरेको छ । अब जिपी भवन निमार्णको कार्य अघि बढ्ने भएको भद्रपुर नगरपालिकाका नगरप्रमुख गणेश पोखरेलले जानकारी दिनुभयो ।

२०७२ सालमा १२ करोड ७२ लाख रुपैयाँको ठेक्कामा निर्माण सुरु भएको यो भवनको काम २०७४ भदौमा रोकिएको थियो। प्रेरा–शाह जेभी कम्पनी सँग सम्झौता भएर करिब ११ करोड रुपैयाँ भुक्तानी भइसके पनि भवन निर्माण अलपत्र अवस्थामा थियो। बजेट प्राप्त भएसँगै आगामी आर्थिक वर्षदेखि काम सुरु गरेर अधुरो भवनलाई पूरा गर्ने बाटो खुलेको छ।

सभागृहको पहिलो तलामा व्यापारिक प्रयोजनका २७ सटर, दोस्रो तलामा तीन वटा बैंकका लागि फ्ल्याट र तेस्रो तलामा १,००० जनाको अत्याधुनिक सभाहल रहने योजना छ। भवनको लम्बाइ ५३ मिटर र चौडाइ ३४ मिटर रहेको छ।

२०७२ असार २८ गते तत्कालीन प्रधानमन्त्री सुशील कोइराला, पूर्वप्रधानमन्त्री केपी शर्मा ओली, पूर्वप्रधानमन्त्री पुष्पकमल दाहाल ‘प्रचण्ड’ लगायतका शीर्ष नेताहरूले सभागृहको संयुक्त रुपमा शिलान्यास गर्नुभएको थियो ।

प्रकाशित मिति: शुक्रबार, जेठ २३, २०८२ १७:०१