कालोपत्रे गरेको एक सातामै सहिद मार्गको जमिन मुनिबाट पानी निस्कियो

स्थानीय

गृहपृष्ठ
स्थानीय

कालोपत्रे गरेको एक सातामै सहिद मार्गको जमिन मुनिबाट पानी निस्कियो

सेतोपत्र डेस्क मंगलबार, जेठ ७, २०८२

पानी रसाईरहेको सहिद मार्गको क्षेत्र ।

धुलाबारी, जेठ ६ । झापाको मेचीनगर ९ स्थीत सहिद मार्गमा कालोपत्रे गरेको एक सातामा नै पानी रसाउन थालेको छ । मेचीनगर ९ को खुट्टीडाँगी चोक भन्दा केही दक्षिण तर्फ कालोपत्रे सडकको मुनिबाट लगातार पानी निस्किरहेको स्थानीयहरुले बताएका छन । हिजो बेलुकादेखि कालोपत्रे सडकको बिचबाट नै लगातार पानी बाहिर निस्किरहेको स्थानीय लिलाप्रसाद भण्डारीले बताउनु भयो । धुलाबारी खानेपानी उपभोक्ता समितिमार्फत वितरण भइरहेको पानीको मुख्य पाइपलाईनलाई व्यवस्थापन नगरी त्यसकै माथीबाट सडक निर्माण गरेको र यातायाता सञ्चालनका कारण सडकमा भएको कम्पनका कारण अहिले पानी बाहिर निस्किएको शिक्षक समेत रहनु भएका भण्डारीको दाबी छ ।

कालोपत्रे सडकबाट पानी रसाएको भिडियो समेत सामाजिक सञ्जालमा राखेर भण्डारीले लेख्नु भएको छ, ‘पानीको बहाब र चाप बढि हुँदा बाटोमा कम्पन्न आइरहेको छ, पाइप फुटेमा यसले दुर्घटना ल्याउन सक्छ, यसबाट सडक यात्रु र छेउछाउका बालबालिका आफैं जोखिममा छन ।’ कालोपत्रे मुनि रहेको पानीको पाईप पुटेमा ठुलो दुर्घटना हुन सक्ने तर्फ भण्डारीले सरोकारवालाहरुलाई सचेत समेत गराउनु भएको छ । सहिद मार्गको कालोपत्रे गरेको क्षेत्रको करीब दुई किलोमिटरमा सडकको जमिन मुनि खानेपानीको पाईप रहेकाले त्यो क्षेत्रमा सडक पुननिर्माण गर्नु पर्ने स्थानीयहरुले माग गरेका छन ।

खानेपानीको मुख्य पाइपबाट घरमा वितरण गरेको जोडेको ठाउँबाट पानी लिकेज भएर पानी सडकमा निस्किएको धुलाबारी खानेपानी उपभोक्ता समितिका अध्यक्ष धनकाजी खत्रीले जानकारी दिनुभयो । ‘यस्तै समस्या आउँछ भने सडक निर्माणको सुरुदेखि नै सडकको दुई छेउबाट खानेपानीको नयाँ पाइपलाईन बिस्तार गर्नु पर्छ भनिरहेका थियौं,’ अध्यक्ष खत्रीले भन्नुभयो, ‘तर नगरपालिका र निर्माण कम्पनीले हाम्रो कुरामा गम्भिर भएन त्यसैले आज समस्या भयो ।’ पानी निस्किएको ठाउँमा सडक भत्काएर नै पाइप मर्मत गर्नु पर्ने अध्यक्ष खत्रीले बताउनु भयो ।
धुलाबारी चोकदेखि उत्तर थोप्लेविरान वन समितिको कार्यालयसम्म करीब साढे पाँच किलोमिटर सहिद मार्ग निर्माणको ठेक्कामा सडकको दुई छेउमा खानेपानीको पाईपलाईन राख्ने समेतको रकम समावेश गरिएको छ ।

हेर्नुहोस,सहिद मार्गमा पानी रसाएको बिषयमा स्थानीय लिलाप्रसाद भण्डारीको फेसबुक पोष्ट ।