रेविज विरुद्धको खोप अब मेचीनगरको नगर अस्पतालमा

स्वास्थ्य

गृहपृष्ठ
स्वास्थ्य

सेतोपत्र डेस्क सोमबार, वैशाख २२, २०८२

धुलाबारीमा रहेको मेचीनगर आधारभुत अस्पताल ।

धुलाबारी, वैशाख २२ । रेविज रोग विरुद्धको खोप अब झापाको मेचीनगर नगर अस्पतालमा नै लगाउन सकिने भएको छ । धुलाबारीमा रहेको मेचीनगर आधारभुत अस्पतालमा रेविज विरुद्धको खोप लगाउन सुरु गरिएको मेचीनगर स्वास्थ्य शाखा प्रमुख सविता सापकोटाले बताउनु भयो । ‘रेविज बिरुद्धको खोप लगाउन अब टाढा जानु पर्दैन,’ स्वास्थ्य शाखा प्रमुख सापकोटाले भन्नुभयो, ‘हामीसंग खोप पर्याप्त छ ।’ केही दिन अघि स्वास्थ्य मन्त्रालयले खोप पठाउन ढिलो गरेका कारण केही दिन समस्या आएको तर अब रेविज खोप पर्याप्त भएको सापकोटाले जानकारी दिनुभयो ।

मेचीनगर आधारभुत अस्पतालमा रेविज बिरुद्धको खोप लगाउँदै स्वास्थ्यकर्मी ।

‘रेविज विरुद्धको खोप सामान्यतया पहिलो दिन, सात दिनमा र २१ दिनमा गरी तीन वटा लगाइन्छ,’ सापकोटाले भन्नुभयो, ‘तर विरामीको अवस्था हेरेर चिकित्सकको सिफारिसमा त्यो भन्दा बढी खोप पनि लगाउनु पर्ने हुन सक्छ ।’ जति वटा खोप लगाए पनि एक पूर्ण खोपको रु ३५०।– शुल्क तिर्नु पर्ने सापकोटाले जानकारी दिनुभयो । मेचीनगर नगरपालिकाले सञ्चालन गरेको आधारभुत अस्पतालमा अहिले दैनिक सरदर ५ जनाले रेविज विरुद्धको खोप लगाइरहेको अस्पतालका सिनियर अहेब हेमन्त खतिवडाले जानकारी दिनुभयो ।

यस अघि रेविज विरुद्धको खोप लगाउन मेची प्रादेशिक अस्पताल भद्रपुर वा स्थानीय निजि क्लिनिकहरुमा जानु पर्ने बाध्यता थियो । कुकुर, विरोलो लगायतका जनावरले टोकेको वा नङग्राएको अवस्थामा रेविज विरुद्धको पुर्ण खोप अनिवार्य लगाउनु पर्छ ।

प्रकाशित मिति: सोमबार, वैशाख २२, २०८२ ०७:४७