ताप्लेजुङमा जीपमा करेन्ट लागेर आगलागी हुँदा चार जनाको मृत्यु

स्थानीय

गृहपृष्ठ
स्थानीय

सेतोपत्र डेस्क सोमबार, वैशाख ८, २०८२

ताप्लेजुङ ,वैशाख ८। ताप्लेजुङको फुङलिङमा जीपमा करेन्ट लागेर आगलागी हुँदा चार जनाको मृत्यु भएको छ । दुई जना घाइते भएका छन् ।

आज बिहानै यात्रु लिएर पाथीभरातर्फ जाँदै गरेको मे१ज ३०११ नम्वरको जीप पाथीभरा क्षेत्रको सेवारो चोकमा बिजुलीको पोलबाट लत्रिएको तारमा छोएपछि आगलागी र दुर्घटनामा परेको हो ।

दुर्घटनामा परी मृत्यु हुनेमा चालक ताप्लेजुङको फुङलिङ नगरपालिका–१० का ४२ वर्षीय दुर्गा भट्टराई, यात्रुहरू ललितपुर महानगरपालिका–१० की १६ वर्षीया आध्या आचार्य, झापाको भद्रपुर नगरपालिका–१५ का ७० वर्षीय विनोद पौडेल र उहाँकी श्रीमती ६९ वर्षीया सरिता पौडेल रहेको जिल्ला प्रहरी कार्यालय ताप्लेजुङले जनाएको छ ।

दुर्घटनामा ललितपुर महानगरपालिका १० बस्ने ४५ वर्षीया सविना आचार्य र उहाँका छोरा १० वर्षीय भविमय आचार्य घाइते हुनुभएको छ । मृतक आध्या घाइते सबिना आर्चायको छोरी तथा पौडेल दम्पती माइततर्फको आमाबुबा रहेको प्रहरीले जनाएको छ ।

चट्याङपछि झोलिएको तारले गाडी दुर्घटना भएको खुलेको छ । हिजो चट्याङका कारण इन्सुलेटरमा क्षति पुगेपछि लत्रिएकोे तारले दुर्घटना निम्त्याएको नेपाल विद्युत् प्राधिकरणका प्रवक्ता राजाभाइ शिल्पकारले जानकारी दिनुभयो ।

प्रकाशित मिति: सोमबार, वैशाख ८, २०८२ १२:४४