एसईई परीक्षा आजदेखि, झापामा १७ हजार बढी विद्यार्थी सहभागि हुँदै

देश

गृहपृष्ठ
देश

सेतोपत्र डेस्क बिहीबार, चैत ७, २०८१

मेचीनगर, चैत ७ । माध्यमिक शिक्षा परीक्षा (एसईई) आजदेखि सुरु हुँदैछ । राष्ट्रिय परीक्षा बोर्ड, परीक्षा नियन्त्रण कार्यालयका अनुसार देशभरका दुई हजार ७९ परीक्षा केन्द्रबाट आज बिहान ८ बजेदेखि एसईई सञ्चालन हुनेछ । परीक्षा तालिकाअनुसार पहिलो दिन अनिवार्य अङ्ग्रेजी तथा संस्कृत वेदविद्याश्रमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा सञ्चालन हुनेछ । यस वर्षको माध्यमिक शिक्षा परीक्षामा पाँच लाख १४ हजार ७१ जना विद्यार्थी सहभागी हुने पनि बोर्डले जनाएको छ । परीक्षामा ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिएको कार्यालयले जनाएको छ । यस वर्षको एसईई आजदेखि सुरु भएर यही चैत १९ गतेसम्म सञ्चालन हुनेछ ।

झापामा यो वर्ष १७ हजार २८ जना विद्यार्थी एसईईमा सहभागी हुँदैछन । गत बर्ष १५ हजार ८२२ विद्यार्थीले एसईई दिएका थिए । झापाका १३१ सामुदायिक तथा २३९ संस्थागत गरी ३७० विद्यालयका विद्यार्थीहरु एसईईमा सहभागी बन्ने शिक्षा विकास तथा समन्वय इकाइ झापाले जनाएको छ । जसमा छात्रातर्फ ८ हजार ७८४ तथा छात्रतर्फ ८ हजार २४४ परीक्षार्थी रहेका छन । झापामा नियमिततर्फ ७ हजार ७९३ छात्रा तथा ७ हजार ४०८ छात्र गरी १५ हजार २०१ जना सहभागी छन । ग्रेडवृद्धितर्फ ९९१ छात्रा तथा ८३६ छात्र गरी १ हजार ८२७ परीक्षार्थी सहभागी छन ।

झापाको मेचीनगरमा दुई हजार ४ सय २१ जना विद्यार्थीले एसईईको परीक्षा दिदैंछन । मेचीनगरमा ७ वटा परीक्षा केन्द्रबाट एसईई परीक्षा सञ्चालन हुँदैछ । मेचीनगरको भानु मावि मेचीनगर २, मेची जनसाधारण मावि मेचीनगर २, काकरभिट्टा मावि मेचीनगर ६, आदर्श मावि मेचीनगर ८, कविशिरोमणी मावि मेचीनगर ९, धुलाबारी मावि मेचीनगर १० र शहिद दशरथचन्द मावि मेचीनगर १३ मा एसईईको परीक्षा केन्द्र तोकिएको छ ।

प्रकाशित मिति: बिहीबार, चैत ७, २०८१ ०६:५४