मेचीनगर गोल्डकपः फाइनल प्रवेशका लागि चर्च ब्वाइज र मच्छिन्द्र भिड्दै

खेलकुद

गृहपृष्ठ
खेलकुद

सेतोपत्र डेस्क बिहीबार, फागुन २९, २०८१

झापा, फागुन २९ । झापाको काकरभिट्टामा जारी पाँचौ मेचीनगर गोल्डकपको आज दोस्रो सेमिफाइनल खेल हुँदैछ । फाइनल प्रवेशका लागि चिरपरिचित प्रतिद्वन्दी चर्च ब्वाइज युनाइटेड काठमाडौं र मच्छिन्द्र फुटबल क्लब काठमाडौंबिच प्रतिस्पर्धा हुँदैछ ।

काँकरभिट्टा फुटबल ट्रेनिङ सेन्टरको आयोजनामा दिउँसो ३ बजेदेखि काँकरभिट्टा खेल मैदानमा हुने खेलमा फाइनल पुग्नका निमित्त दुवै टोली उच्च मनोबलका साथ मैदानमा उत्रिने छन । चर्च ब्वाइजले यसअघि एनएसएलको तयारीमा रहेको झापा एफसीलाई पराजित गर्दै अन्तिम चारमा प्रवेश गरेको थियो । त्यस्तै मच्छिन्द्रले विभागीय टिम सशस्त्र प्रहरीको एपीएफ एफसी काठमाडौंलाई पराजित गर्दै अघिल्लो चरणमा प्रवेश गरेको थियो । यस अघि बुधबार भएको पहिलो सेमिफाइनलमा धरान एफसी सुनसरीलाई पराजित गर्दै आयोजक काँकरभिट्टा फुटबल ट्रेनिङ सेन्टर फाइनल प्रवेश गरिसकेको छ ।

चैत २ गते हुने फाइनल खेलको विजेताले नगद १० लाख, ट्रफी र मेडल पाउनेछ भने उपविजेताले नगद पाँच लाख, ट्रफी र मेडल प्राप्त गर्ने छ । त्यस्तै, प्रतियोगिताको सर्वोत्कृष्ट खेलाडीले नगद ५१ हजार र ट्रफी पाउँदा उच्च गोलकर्ताले नगद २५ हजार र ट्रफी पाउने छन् । उत्कृष्ट प्रशिक्षक र गोलकिपरले नगद २१ हजार र ट्रफी तथा उदीयमान खेलाडीले नगद ११ हजार र ट्रफी पाउने छन् । प्रत्येक दिनको प्लेयर अफ द म्याचले नगद ११ हजार र ट्रफी पाउने छन ।

झापा जिल्ला फुटबल संघ र मेचीनगर नगर खेलकुद विकास समितिको प्राविधिक सहयोग रहेको प्रतियोगिताको संरक्षकमा मेचीनगर नगरपालिका संरक्षक तथा मुख्य प्रायोजक धुलाबारीको होटल मेची क्राउन रहेको छ ।

प्रकाशित मिति: बिहीबार, फागुन २९, २०८१ ०७:५३