मेचीनगरका हाकिमले रोके कर्मचारीको तलब

स्थानीय

गृहपृष्ठ
स्थानीय

सेतोपत्र डेस्क शुक्रबार, माघ ११, २०८१

झापा, माघ ११ । झापाको मेचीनगर नगरपालिकाका प्रमुख प्रसाशकीय अधिकृत अग्निप्रसाद अधिकारीले नगरपालिकामा कार्यरत एक जना कर्मचारीको तलब रोकिदिनु भएको छ । मेचीनगरमा कार्यरत कम्प्युटर अधिकृत इश्वर कुमार भट्टराईको मंसिर महिनाको तलब प्रमुख प्रशासकीय अधिकृत अधिकारीले रोक्का गर्नु भएको हो ।

कम्प्युटर अधिकृत भट्टराईको मंसिर महिनाको तलब माघ ३ गते बैंक खातामा जम्मा भएको थियो । जम्मा भएको केही समय पछि नै खाताबाट फिर्ता गएको भट्टराईले बताउनु भयो । सबै कर्मचारीको तलब बैंक खातामा पठाउँदा भट्टराईको पनि खातामा जम्मा भएको तर नगरपालिकाका प्रमुख प्रशासकीय अधिकृतले नेपाल बैंक लिमिटेड काकरभिट्टालाई सोही दिन अर्थात माघ ३ गते नै पत्र लेखेर भट्टराईको तलब नगरपालिकाको बैंक खातामा फिर्ता गर्न भने पछि बैंकले सोही पत्रको आधारमा आफ्नो खातामा जम्मा भइसकेको तलब फिर्ता भएको भट्टराईले बताउनु भयो ।

‘कर्मचारीको मंसिर महिनाको तलब मंसिर २३ गते खातामा पठाएको थियौं’, मेचीनगरका लेखा अधिकृत पदम बहादुर कार्कीले भन्नुभयो, ‘खातामा जम्मा भएको कुनै कर्मचारीको तलब फिर्ता भएको बिषय मलाई जानकारी छैन ।’

मंसिर महिनामा भट्टराईको २० दिनको तलब कट्टा गर्नु पर्नेमा पुरै तलब खातामा जम्मा भएकाले फिर्ता गरिएको प्रमुख प्रशासकीय अधिकृत अधिकारीले बताउनु भयो । ‘वहाँको मंसिर महिनामा २० दिनको गयल कट्टी गर्नु पर्ने छ,’ अधिकारीले भन्नुभयो, ‘त्यो कट्टा गरेर बाँकी रकम केही दिनमा खातामा जम्मा हुन्छ ।’

मेचीनगरका कर्मचारीले पुष महिनाको समेत तलब पाइसकेका भए पनि आफ्नाे तलब अहिलेसम्म जम्मा नभएकाे भट्टराईले बताउनु भयाे ।

कम्प्युटर अधिकृत भट्टराईको नगरकार्यपालिकाको सिफारिसमा प्रदेशका प्रमुख सचिवस्तरिय निर्णयबाट उदयपुरको ताप्ली गाउँपालिकामा सरुवा गरिएको थियो तर अदालतको अन्तरिम आदेशले भट्टराईको सरुवा रोकेको छ ।

प्रकाशित मिति: शुक्रबार, माघ ११, २०८१ १७:५८