शर्माले गरे कोशी प्रदेशकै लामो झोलुङ्गे पुलको उदघाटन

स्थानीय

गृहपृष्ठ
स्थानीय

सेतोपत्र डेस्क बिहीबार, पुस २५, २०८१

बुद्धशान्ति,पुस २५ । झापाको बुद्धशान्ति गाउँपालिकाको टिमाई नदीमा पाँच महिनाको अवधिमै निमार्ण सम्पन्न भएको झोलुङ्गे पुलको औपचारीक रुपमा आज उद्घाटन गरिएको छ ।

झापा निर्वाचन क्षेत्र नं १ का प्रतिनिधिसभा सदस्य एवम् नेपाली कांग्रेसका महामन्त्री विश्वप्रकाश शर्माले गत असार २४ गते शिलान्यास गरेको यो झोलुङ्गे पुलको आज शर्माले नै उद्घाटन गर्नुभएको हो ।
‘कोलुबुंगे गौडा रमिते गौडा झोलुङ्गे पुल’ नाम दिइएकोे चार सय ७७ मिटर लामो डी आकारको यो पुल कोशी प्रदेशकै लामो झोलुङ्गे पुल हो ।

बुद्धशान्ति–६ र ७ को दुई वटा गाउँ कोल्बुङ र रमिते गौडाबासीलाई टिमाईको गहिरो गल्छी छिचोल्न निर्माण गरिएको यो झोलुङ्गे पुल संघीय सरकारको पाँच करोड ९८ लाख ७६१ को लागतमा थानी जगदम्बा जेभीले निर्माण सम्पन्न गरेको हो ।

पुलको उद्घाटन गर्दै महामन्त्री शर्माले वर्षौदेखि आवागमनमा सकस भोगिरहेका बुद्धशान्तिको वडा नं. ६ र ७ का बासिन्दा मात्र नभएर इलामको कृषि उत्पादन झापामा ल्याएर विक्री गर्न समेत पुलको निर्माणले सहज भएको बताउनुभयो ।

त्यस्तै बुद्धशान्ति गाउँपालिकाका अध्यक्ष मनोज प्रसाईले पुल नयाँ पर्यटकीय गन्तव्यका रुपमा विकास हुदै गरेकाले पूर्वाधारहरु थप्ने पालिकाको योजना रहेको बताउनुभयो । अहिले पुलको वडा नं ७ तर्फको किनारामा चार करोड ५० लाखको बजेटमा बुद्धशान्ति हरित उद्यान निर्माण कार्य अघि बढाइएको उहाँले जानकारी दिनुभयो ।

९० मेट्रिक टन भारवहन क्षमता रहेको यो झोलुङ्गे पुलले एकपटकमा ६ सय ४७ पदयात्रीको भार थेग्न सक्छ । झोलुङ्गे पुल घुम्न आउनेको चाप बढेपछि पालिकाले नगरप्रहरी परिचालन गरेर पुलमा ओहोरदोहोर गर्ने यात्रुको व्यवस्थान गरिरहेको छ ।

प्रकाशित मिति: बिहीबार, पुस २५, २०८१ १६:५३