मेचीनगरमा सिटी सफारीको दर्ता सूरु

स्थानीय

गृहपृष्ठ
स्थानीय

मेचीनगरमा सिटी सफारीको दर्ता सूरु

सेतोपत्र डेस्क बिहीबार, असोज २४, २०८१

पहिलो दर्ता गर्ने सिटी सफारी धनीलाई प्रमाण पत्र वितरण गर्दै नगर उपप्रमुख र प्रमुख प्रशासकीय अधिकृत ।

झापा, असोज २४ । मेचीनगर नगरपालिका कार्यालयले तीन पाङ्ग्रे ई–रिक्शा अर्थात सिटी सफारीको दर्ता प्रक्रिया शुरु गरेको छ । योसंगै सफारीहरूको धमाधम दर्ता गरि सवारी दर्ता प्रमाण पत्र वितरण सुरु गरिएको नगरपालिका कार्यालयले जनाएको छ । नगरपालिका क्षेत्राधिकारभित्र रहेका ई–रिक्साको व्यवस्थापन, दर्ता, नविकरण गर्ने जिम्मा प्रदेश सरकारले सम्बन्धित पालिकालाई हस्तान्तरण गरेपछि ऐन कार्यान्वयन गर्न मेचीनगर नगरपालिकाले “ सिटी सफारी व्यवस्थापन सम्बन्धि कार्यविधि २०७९ अनुसार दर्ता प्रक्रिया सुरु गरेको हो ।

पहिलो चरण अन्तरगत कोशी प्रदेश सरकारले मेचीनगर नगरपालिकालाई हस्तान्तरण गरेका दुईसय ५० वटा सिटी सफारी दर्ता गरि सवारी दर्ता प्रमाण पत्र प्रदान गरिने छ । मेचीनगरमा करीब एकहजार सिटी सफारी सञ्चालनमा छन ।
लामो समयको मिहेनत र सम्बन्धित अनि सरोकारवालाहरूसँगको छलफल पछि मेचीनगर नगरपालिकाले बुधबार राजेशकुमार सुनुवारलाई सवारी दर्ता प्रमाण पत्र (ब्लु–बुक) हस्तान्तरण गरि सवारी दर्ता प्रमाण पत्र वितरण कार्य शुरू गरेको हो । मेचीनगरका उपप्रमुख मीना पोखरेल उप्रेती, प्रमुख प्रशासकीय अधिकृत अग्निप्रसाद अधिकारीले संयुक्तरूपमा सुनुवारलाई सवारी दर्ता प्रमाणपत्र हस्तान्तरण गरि सुरुवात गर्नुभएको थियो ।

अव्यवस्थित रूपमा रहेको ई–रिक्सा सवारी कार्यविधि अनुसार मात्र दर्ता गरि मेचीनगरका विभिन्न क्षेत्रमा चलाउन पाइने भएको नगर प्रमुख गोपालचन्द्र बुढाथोकीले बताउनुभयो । यसले गर्दा सिटी सफारी दर्ताका लागि अन्यत्र जानुपर्ने अवस्थाको अन्त्य हुने स्थानीय तहमानै दर्ता नविकरण हुने उहाँको भनाई छ । अहिले मेचीनगरको मुख्य समस्यामा देखिएको ई–रिक्सा, सवारी कार्यविधि बनेसँगै यातायात व्यवस्थापनमा सहजता हुने देखिएको छ । व्यवस्थित रूपमा लैजानलाई ई–रिक्सा दर्ता प्रक्रियामा नम्बरिङ पनि भएकाले ई–रिक्सा पहिचान गर्न ट्राफिक व्यवस्थापनमा सहजता हुने भएको छ ।

प्रकाशित मिति: बिहीबार, असोज २४, २०८१ ०७:५१