इलामको सुकिलुम्बा विमानस्थल दुई महिनादेखि बन्द

स्थानीय

गृहपृष्ठ
स्थानीय

सेतोपत्र डेस्क सोमबार, साउन १४, २०८१

झापा,साउन १४ । खराब मौसमका कारण इलामको सुकिलुम्बा विमानस्थल दुई महिनादेखि बन्द रहेको छ । हवाईउडान बन्द भएपछि यात्रुहरु समस्यामा परेका छन् । खराब मौसमका कारण गएको जेठ १७ गते बाट उडान हुन नसकेको सुकिलुम्बा विमानस्थल इलामका स्टेसन इन्चार्ज दिनेश सुन्दासले जानकारी दिनुभयो ।

यसअघि गत जेठ १३ गते नेपाल एयरलाइन्सको जहाजले उडान भरेको थियो । जेठ १७ गते काठमाडौँबाट इलामका लागि उडेको जहाज खराब मौसमका कारण अवतरण गर्न नसकेर पुनः काठमाडौँ नै फर्केको थियो । अब मौसममा सुधार नआउन्जेलसम्म हवाई उडान इन्चार्ज सुन्दासको भनाइ छ । नेपाल एयरलाइन्सले २०७९ माघ १ गतेदेखि इलाम–काठमाडौँ उडान भर्दैआएको थियो । नेपाल एयरलाइन्सले सातामा आइतबार र बिहीबार गरी दुई दिन उडान भर्दै आएको थियो ।

नेपाल एयरलाइन्सको विमानले उडान सुरु गर्नु अघि सीता एयरलाइन्सको विमानले उडान भर्दै आएको इन्चार्ज सुन्दासले बताउनुभयो । सुकिलुम्बा विमानस्थल इलाम नगरपालिका–९ मा पर्छ । मौसम खुलेपछि नियमित उडान बताइएको छ । हवाई उडान बन्द भएपछि इलामका यात्रुले झापाको भद्रपुर विमानस्थलबाट हवाई यात्रा गर्दै आएका छन् ।

प्रकाशित मिति: सोमबार, साउन १४, २०८१ १६:५३