काँग्रेस संसद विघठनको पक्षमा छैनः उद्धव थापा

राजनिति

गृहपृष्ठ
राजनिति

सेतोपत्र डेस्क मंगलबार, चैत २७, २०८०

झापा, चैत २७ । नेपाली काँग्रेसका कोशी प्रदेशका सभापति तथा संसदिय दलका नेता उद्धव थापाले कोशी प्रदेशसभा विघठनको पक्षमा काँग्रेस नरहेको बताउनु भएको छ । ‘संसद विघठन गर्नु हुँदैन, काँग्रेस यसको पक्षमा पनि छैन,’ सेतोपत्रसंग कुरा गर्दै थापाले भन्नुभयो, ‘मध्यावधि बिकल्प होईन ।’ काँग्रेसले अहिलेकै सरकारलाई टिकाउन पहल गर्ने र यसका लागि अन्य दलहरुसंग छलफल गर्ने थापाले बताउनु भयो ।

‘कोसिस गर्दा पनि सरकार टिकाउन सकिएन भने काँग्रेसकै कारण मध्यावधिमा जानु हुन्न, सभापति थापाले भन्नुभयो, ‘त्यसो भयो भने काँग्रेसले ठुलो मुल्य चुकाउनु पर्छ ।’ मध्यावधीको कारक काँग्रेस बन्नु नहुने र त्यस्तो अवस्था आयो भने मार्ग प्रसस्त गर्नु पर्ने थापाले बताउनु भयो । उहाँले भन्नुभयो, ‘तत्कालै मुख्यमन्त्रीले राजिनामा दिनु पर्छ भन्ने पनि मेरो भनाई होईन तर मध्यावधी कै अवस्थामा जानु भन्दा मार्ग प्रसस्त गर्नु उपयुक्त हुन्छ ।’

थापाले मध्यावधिमा जानु नहुने बताउनु भयो । ‘अहिले मध्यावधिकोे समय पनि छैन’ थापाले भन्नुभयो, ‘मध्यावधिको पक्षमा जनता तथा दलहरु पनि छैनन ।’ नेकपा एमाले र नेकपा माओवादी केन्द्रले मुख्यमन्त्री केदार कार्कीलाई दिएको समर्थन सोमबार फिर्ता लिएका कारण कोशी प्रदेश सरकार अल्पमतमा परेको छ ।

संविधानको धारा १६८ को ५ बाट मुख्यमन्त्री बन्नुभएका काँग्रेस नेता केदार कार्कीले आफुले विश्वास मत लिनु नपर्ने बताइरहनु भएका बेला कोशीमा संसद विघटन गरी मध्यावधीको मिति तोक्ने चर्चा चलिरहेको छ ।

प्रकाशित मिति: मंगलबार, चैत २७, २०८० ०७:४६