डा गोबिन्द केसीको जीवन रक्षाका लागि दीप प्रज्वलन

स्थानीय

गृहपृष्ठ
स्थानीय

सेतोपत्र डेस्क शुक्रबार, असोज २३, २०७७

धुलाबारी, असोज २३ ।
चिकित्सा शिक्षामा आम नागरिकको पहुँच सहितको सुधारको माग राख्दै १९ पटक अनशनमा बस्नु भएका प्रा डा गोबिन्द केसीको जीवन रक्षाका लागि झापा धुलाबारीका युवाहरुले आज दीप प्रज्वलन गरेका छन ।

आम मानिसको आवाज बोलिरहेका केसीले उठाएका बिषयलाई सरकारले सम्बोधन गर्नु पर्ने र तत्काल कार्यान्वयनमा लैजानु पर्ने भन्दै सरकारलाई दबाब दिने उद्देश्यले दीप प्रज्वलन गरिएको धुलाबारीका युवा मनोज घिमिरेले बताउनु भयो ।

डा केसी आफ्ना लागि नभइ सबै नेपालीका लागि र खास गरी सामान्य परिवारका सदस्यले समेत चिकित्सा शिक्षामा पहुँच बिस्तार गर्न सकुन भन्ने उद्देश्यले पटक पटक माग राखेर जीवन जोखिममा पारेर अनशन बसिरहेको भए पनि सरकारले वेवास्ता गरेकाले दबाब दिन पनि दीप प्रज्वलन कार्यक्रम गरिएको अर्का युवा नारायण खनालले बताउनु भयो ।

दीप प्रज्वलन कार्यक्रममा सहभागि हुनु भएका साझा पार्टीका प्रदेश १ का संयोजक समेत रहनु भएका अनिल भेटलवालले डा गोबिन्द केसीले उठाएको आवाज आम नेपालीको आवाज भएकाले पनि डा केसीको पक्षमा देशब्यापी रुपमा आम नागरिकले चासो राख्नु पर्ने बताउनु भयो । धुलाबारी चौकमा गरिएको दीप प्रज्वलन कार्यक्रममा स्वत स्फुर्त रुपमा युवाहरुको सहभागिता रहेको थियो ।