सीमा सुरक्षामा खटिएको सशस्त्र प्रहरीले एक रुपैयाँ पनि घुस खादैंनः डिआईजी पोखरेल

देश

गृहपृष्ठ
देश

सेतोपत्र डेस्क मंगलबार, मंसिर १९, २०८०

सशस्त्र प्रहरीका नयाब महानिरीक्षक अन्जनीकुमार पोखरेल ।

झापा, मंसिर १९ । सशस्त्र प्रहरीका नयाब महानिरीक्षक अन्जनीकुमार पोखरेलले सीमा सुरक्षामा खटिएको सशस्त्र प्रहरीले एक रुपैयाँ पनि घुस नखाने दाबी गर्नु भएको छ । सोमबार पुर्वी नाकामा सीमा स्तम्भको मर्मत कार्यको थालनीका अवसरमा बोल्दै सशस्त्रका डिआईजी पोखरेलले आर्थिक अनुशासनमा कडाईका साथ काम गरिरहेको बताउनु भएको छ । ‘अहिले सीमा क्षेत्रमा खटिएको सशस्त्र प्रहरीको जनशक्तिले नागरिकसंग एक रुपैयाँ पनि लिदैंन,’ डिआईजी पोखरेलले भन्नुभयो, ‘जुनसुकै तहको सशस्त्र प्रहरीले पैसा मागेको थाहा पाउने बित्तिकै खबर गर्नुहोस त्यसलाई तत्काल कारबाहीको दायरामा ल्याउँछौं ।’

सीमा सुरक्षासंगै सीमानाका आसपास बसोबास गर्ने नेपालीलाई सहयोग गर्नु बर्दी लगाएको सशस्त्र प्रहरीको प्रमुख जिम्मेवारी भएको पोखरेलले बताउनु भयो । उहाँले सशस्त्र प्रहरीले सीमा सुरक्षाको जिम्मेवारी पाए पछि पछिल्लो १० बर्ष यता अब्बल काम गरिरहेको दाबी गर्नु भयो । ‘अब सीमा स्तम्भ यताउता सार्ने काम हुँदैन,’ डिआईजी पोखरेलले भन्नुभयो, ‘डिजिटल बोर्डरको अवधारणा अनुरुप प्रविधिको प्रयोग गरिएको छ ।’ पोखरेलका अनुसार अहिले सीमा स्तम्भ हरायो भने पनि डिजिटल प्रविधिको सहायताले तत्कालै त्यो स्तम्भ कुन ठाउँमा थियो भन्ने सजिलै पत्ता लाग्ने छ ।

आन्तरिक सुरक्षा बलियो बनाउन पनि सीमा सुरक्षा सबैभन्दा महत्वपुर्ण हुने डिआईजी पोखरेलले बताउनु भयो । उहाँले भन्नुभयो, ‘देशभित्रको सुरक्षा जतिसुकै मजबुत बनाए पनि सीमा सुरक्षा बलियो भएन भने त्यसको केही अर्थ हुँदैन ।’ कोशी प्रदेशमा मात्रै नेपाल भारत करीब ४३० किलोमिटर सीमाना रहेको बताउँदै डिआईजी पोखरेलले सीमा सुरक्षाका लागि जनशक्तिको अभाव भएको बताउनु भयो । करीब १५ सय जना सशस्त्र प्रहरीले चौबिसै घण्टा सीमा सुरक्षाको काम गरिरहेको पोखरेलले बताउनु भयो ।

प्रकाशित मिति: मंगलबार, मंसिर १९, २०८० ०६:५३