६९ जिल्लामा फैलियो डेंगु : कोशी प्रदेशमा सबैभन्दा बढी

स्वास्थ्य

गृहपृष्ठ
स्वास्थ्य

सेतोपत्र डेस्क मंगलबार, साउन ९, २०८०

झापा,साउन ९। डेंगुको संक्रमण ६९ जिल्लामा फैलिएको छ । स्वास्थ्य सेवा विभाग अन्तर्गतको इपिडिमियोलोजि तथा रोग नियन्त्रण महाशाखाका अनुसार ६९ जिल्लाबाट चार हजार २८९ जनामा डेंगु पुष्टि भएको छ ।

महाशाखाका निर्देशक डा. रुद्र मरासिनीका अनुसार डेंगुको संक्रमण कोशी प्रदेशमा सबैभन्दा बढी छ । हालसम्म कोशी प्रदेशको सुनसरी जिल्लाबाट तीन जना डेंगु सङ्क्रमितको मृत्यु भएको छ भने प्रदेशमा दुई हजार ७५४ जनामा डेंगु पुष्टि भएको छ ।

डेगुं एडिस जातको पोथी लामखुट्टेको टोकाइबाट सर्ने एक प्रकारको सरुवा रोग हो । ज्वरो आउने, मांसपेशी दुख्नु, आँखाको गेडी दुख्नु, टाउको दुख्नु, शरीरमा रातो बिमिरा आउनु, वाकवाकी लाग्नु, वान्त हुनु डेंगुका प्रमुख लक्षण हुन् । चिकित्सकका अनुसार डेंगु सङक्रमणबाट बच्न लामखुट्टेको टोकाइबाट बच्नु पर्छ ।

सधैँ झुल टाँगेर सुत्ने, खेतबारीमा काम गर्दा लामो बाहुला भएका लुगा लगाउने , घरको झ्याल ढोकामा जाली हाल्ने, सम्भव भएसम्म लामखुट्टे भगाउने धूप वा मलमको प्रयोग गर्ने तथ कुनै पनि खुल्ला भाँडामा पानी जम्न नदिने लगायतका लामखुट्टेको टोकाइबाट बच्ने उपाय अपनाउनुपर्ने चिकित्सकहरुको भनाई छ ।

प्रकाशित मिति: मंगलबार, साउन ९, २०८० १२:०१