कर्मचारीबीचको द्वन्दले ठेक्का सम्झौता भएन, ठेकेदारले लगाए कार्यालयमा ताला

स्थानीय

गृहपृष्ठ
स्थानीय

कर्मचारीबीचको द्वन्दले ठेक्का सम्झौता भएन, ठेकेदारले लगाए कार्यालयमा ताला

सेतोपत्र डेस्क मंगलबार, माघ २४, २०७९

ठेकेदार कम्पनीका प्रतिनिधिले मेचीनगर कार्यालयको मुल ढोकामा लगाएको ताला ।

झापा, माघ २४ । ठेक्का रकमको पहिलो किस्ता जम्मा गरेर पनि लामो समयदेखि ठेक्का सम्झौता नगरेका कारण ठेकेदार कम्पनीका प्रतिनिधिले सोमबार मेचीनगर नगरपालिकामा ताला लगाइदिएका छन । फाल्गुना निर्माण सेवाका जीवन ढुंगेल नेतृत्वकोे समूहले हिजो केही बेर मेचीनगर नगरपालिकामा तालाबन्दी गरिदिएको हो ।
टिमाई खोलाको नदिजन्य पदार्थ निकाल्न ठेक्का पारेको कम्पनीका प्रतिनिधि ढुंगेलले दुई महिना भन्दा बढी समयमा पनि नगरपालिकाले ठेक्का सम्झौता नगरिदिएका कारण समस्या भएको भन्दै नगरपालिकाको मुल गेटमा नै ताला लगाएको बताउनु भयो ।

‘धरौटी बापत १२ लाख ५० हजार रकम नगरपालिकाको खातामा हालेको दुई महिना भन्दा बढी भयो,’ ढुंगेलले भन्नुभयो, अझै ठेक्का सम्झौता गरिदिएको छैन, हामी कति दिन नगरपालिका धाउनु पर्ने हो ?’ नगरप्रमुख र उपप्रमुखसंगको छलफल पछि ताला खोलिदिएको निर्माण कम्पनीका प्रतिनिधि ढुंगेलले बताउनु भयो ।

टिमाई खोलाको नदिजन्य पदार्थ उत्खननका लागि नगरपालिकाले मंसिरमा नै २६ लाख रुपैयामा ठेक्का लगाएको थियो । सम्पूर्ण प्रक्रिया पुरा भएर ठेकेदारले ठेक्का रकम समेत जम्मा गरिसक्दा पनि नगरपालिकाले सम्झौता गरेर काम अगाडी नबढाउनुमा नगरपालिका भित्रको कर्मचारीबिचको द्वन्द नै रहेको नगरपालिकास्रोतले बताएको छ । ठेक्का सम्झौतामा हस्ताक्षर गर्दा मुद्दा हालहाल गर्ने डरका कारण ठेक्का सम्झौतामा कर्मचारीले हस्ताक्षर गर्नै नमानेका कारण ठेक्का सम्झौता हुन नसकेको बताइएको छ ।

प्रकाशित मिति: मंगलबार, माघ २४, २०७९ ०७:२५