झापा १ : विश्वप्रकाश शर्मा जीत उन्मुख

राजनिति

गृहपृष्ठ
राजनिति

सेतोपत्र डेस्क बुधबार, मंसिर ७, २०७९

मेचीनगर, मंसिर ७ । झापा क्षेत्र नं. १ को प्रतिनिधिसभा सदस्यमा नेपाली काँग्रेसका विश्वप्रकाश शर्मा जीत उन्मुख देखिनु भएको छ । बुधबार विहान ६ बजेसम्मको मतगणनामा शर्मा ११ हजार ६ सय १५ मतान्तरले अघि हुनु हुन्छ । ६३ हजार २ मत गणना हुँदा शर्माले ३१ हजार १ सय १५ मत प्राप्त गर्नु भएको छ भने वहाँका निकतम प्रतिस्पर्धी नेकपा एमालेका अग्नीप्रसाद खरेलले १९ हजार ५ सय मात्रै मत पाउनु भएको छ ।

गणना हुन १८ हजार ७ सय ६२ मत बाँकी हुँदा शर्माको मतान्तर ११ हजार भन्दा बढी भएपछि शर्माको जीत निश्चित जस्तै भएको हो । शर्माले कतिको मतान्तरले जित्ने हो भन्ने मात्रै बाँकी रहेको अवस्थामा झापा १ को मतगणना पुगेको देखिन्छ ।

दुई पटक यसै क्षेत्रबाट पराजित हुनु भएको नेपाली काँग्रेसका महामन्त्री समेत रहनु भएका शर्माले तेस्रो पटक पनि झापा १ बाटै उम्मेद्वार हुने निर्णय गर्दा धेरै काँग्रेसकै कार्यकर्तामा पराजित हुने भय देखिएको थियो तर यस पटक चुनावी माहोललाई शर्माले शुरुवात देखि नै आफ्नो पक्षमा पार्न सफल हुनु भएको थियो । त्यस बाहेक पार्टीका तल्ला कमिटिहुँदै जिल्ला र प्रदेशले समेत एकल नाम सिफारिस गरेका रविन कोईरालालाई अन्तिम अवस्थामा एमाले अध्यक्ष केपी शर्मा ओलीले प्रतिनिधिसभाको टिकट नदिएर प्रदेशसभामा उम्मेद्वार बनाउने निर्णयले झापा १ को एमालेबृत्तमा असन्तुष्टी छाएको थियो ।

यस अघि बाहिरबाट थोपरिएका माओवादीका राम कार्कीलाई विजयी बनाउँदा जनताको सम्पर्कमा नगएको, जनताको दिन दैनिकीसंग सरोकार नराखेको आरोप लागेको थियो । एमालेले पनि झापा १ भन्दा बाहिरका अग्नी खरेललाई प्रतिनिधिसभाको उम्मेद्वार बनाए पछि यस क्षेत्रका मतदाताको पहिलो रोजाईमा विश्वप्रकाश नै परेका थिए ।

प्रकाशित मिति: बुधबार, मंसिर ७, २०७९ ०७:४२