नगरको निर्णय बिपरित बार्षिक परीक्षा गराउँदै मेचीनगरका निजि बिद्यालय

स्थानीय

गृहपृष्ठ
स्थानीय

सेतोपत्र डेस्क शनिबार, जेठ १५, २०७८

मेचीनगर, जेठ १५ । मेचीनगर नगरकार्यपालिकाको निर्णय बिपरित मेचीनगरका केही निजि बिद्यालयहरुले बार्षिक परीक्षा गराउँदै गरेको खुलासा भएको छ ।

कोरोना महामारीका कारण भौतिक रुपमा परीक्षा सञ्चालनग गर्न सभ्भव नभए पछि मेचीनगर नगरपालिकाको जेठ ११ गते बसेको कार्यपालिकाको बैठकले विद्यालयले यस अघि लिएका परीक्षाकै आधार मानेर यस बर्षको बार्षिक परीक्षाको नतिजा प्रकाशन गर्न बिद्यालयहरुलाई निर्देशन गरेको थियो । सोही निर्णयको आधारमा नगरको शिक्षा शाखाले सोही दिन सबै बिद्यालयहरुलाई बार्षिक परीक्षा सञ्चालन नगरी नतिजा मात्रै जेठ मसान्त भित्र प्रकाशन गर्न ३ वटा मापदण्ड सहितको पत्राचार गरेको थियो ।

तर नगरको निर्णय बिपरित गएर मेचीनगरका केही निजि बिद्यालयहरुले अनलाईन माध्यमबाट परीक्षा सञ्चालन गरिरहेको र गर्ने तयारीमा लागेको जानकारी प्राप्त भएको छ ।

नगरपालिकाले निर्णय गरे भन्दा अगाडी नै अनलाईन माध्यमबाट लिएको परीक्षालाई मान्यता दिने तर जेठ ११ गते पछि कुनै पनि माध्यमबाट परीक्षा सञ्चालन गर्न नपाईने मेचीनगरका शिक्षा शाखा प्रमुख होमनाथ भण्डारीले बताउनु भयो । ‘नगरले निर्णय गरेर सूचना नै प्रकाशन गरिसके पछि परीक्षा लिन पाईदैन’ भण्डारीले भन्नुभयो, ‘नगरले निर्धारण गरेका ३ वटा मापदण्डको आधारमा बार्षिक परीक्षाको नतिजा जेठ मसान्त भित्र प्रकाशन गर्नु पर्छ ।’ केही बिद्यालयहरुले आजदेखि अनलाईन माध्यमबाट परीक्षा सञ्चालन गर्ने तयारी गरेको बुझिएको छ ।