जसले भिडभाड गराउँछ, कोरोना फैलिए उसैले उपचार गराउनु पर्ने

स्वास्थ्य

गृहपृष्ठ
स्वास्थ्य

सेतोपत्र डेस्क बिहीबार, वैशाख ९, २०७८

काठमाण्डौ, बैशाख ९ । सरकारले कोरोना महामारी रोकथामतथा नियन्त्रणका लागि निर्धारण गरिएका मापदण्ड लागू नगर्नेलाई कारबाही गर्ने भएको छ । स्वास्थ्य तथा जनसङ्ख्या मन्त्रालयले सूचना जारी गर्दै पछिल्लो समय मुलुकमा बढ्दो कोरोनाको जोखिमसँगै अवस्था थप भयावह बन्न सक्ने भएकाले सरकारद्वारा जारी जनस्वास्थ्यका मापदण्ड कडाईका साथ लागू गर्न/गराउन अपिल गरेको छ । कुनै पनि धार्मिक तथा सांस्कृति कार्यक्रमका नाममा भिडभाड बढाएर त्यसबाट कोरोना संक्रमण फैलिए उक्त कार्यक्रम आयोजक संस्था वा ब्यक्तिले ती सबै संक्रमितको उपचार गर्नु पर्ने स्वास्थ्य मन्त्रालयले उल्लेख गरेको छ ।

सङ्क्रामक रोग ऐन, २०२० को दफा २ ले दिएको अधिकार प्रयोग गरी यहि वैशाख ६ गते कोरोना सङ्क्रमणको रोकथाम तथा नियन्त्रणका लागि जारी भएको आदेश उल्लघंन भएमा कारबाही गरिने सूचनामा उल्लेख छ । यस्तै सरकारले जारी गरेको आदेश अनुसार मापदण्डको पालना नभएमा र आदेशको उल्लघंन हुने गरी भएका गतिविधिहरुका कारण संक्रमण हुन गएमा सङ्क्रमितको परीक्षण, उपचार सम्बन्धीत संस्था / निकाय आफैले आफ्नो खर्चमा गर्नु पर्ने तथा नियमानुसारको कारबाही समेत गरिने मन्त्रालयको सूचनामा उल्लेख छ ।

सरकारले ६ गते जारी गरेको आदेशमा शैक्षिक संस्था बन्द गर्न, धार्मिक, सांस्कृतिक गतिविधि गर्ने माथि अनुगमन बढाउन, सार्वजनिक र निजी निकायहरुमा जनस्वास्थ्यका मापदण्ड कडाईका साथ लागू गर्न गराउन भनेको छ ।