दैनिक बढ्दै छ कोरोना संक्रमण, आज मात्रै ३३७ जना संक्रमित

स्वास्थ्य

गृहपृष्ठ
स्वास्थ्य

सेतोपत्र डेस्क शनिबार, चैत २८, २०७७

काठमाण्डौ, चैत २८ । नेपालमा कोरोना संक्रमण दैनिक बढ्दोक्रममा छ । कोरोनाको दोस्रो लहर शुरु भए यता आज एकै दिनमा सबैभन्दा धेरै संक्रमित थपिएका छन । पछिल्लो २४ घण्टामा थप ३३७ जनामा कोरोना भाइरस सङ्क्रमण पुष्टि भएको छ । हिजो २८८ जनामा सङ्क्रमण पुष्टि भएकोमा आज सो संख्या बढेर ३३७ जना पुगेको हो । यसअघि अस्ति बिहिबार ३३२ जनामा सङ्क्रमण पुष्टि भएको थियो । छिमेकी देश भारतमा कोरोनाले भयावह रुप लिँदै गर्दा नेपालमा पनि त्यसको असर देखिएको छ भने पछिल्लो समय सङ्क्रमितको संख्या बढ्दै गएको हो ।

सङ्क्रमण बढ्दै गएपछि सरकारले स्वास्थ्य मापदण्ड पालनामा जोड दिँदै आएपछि प्रभावकारी कार्यान्वयन हुन सकेको छैन । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ३५३२ जनाको पीसीआर परीक्षण गर्दा ३३७ जनामा सङ्क्रमण पुष्टि भएको हो । यो बीचमा १ जनाको मृत्यु भएको छ भने १५१ जना निको भएको पनि मन्त्रालयले जनाएको छ । देशभर कोरोना सङ्क्रमितको संख्या २ लाख ७९ हजार ७२५ पुगेको छ । निको हुनेको संख्या २ लाख ७३ हजार ८ सय ८६ पुगेको छ । देशभर सक्रिय सङ्क्रमित २८ सय छन् ।

प्रकाशित मिति: शनिबार, चैत २८, २०७७ २०:१८