बिएण्डसीमा दुर्घट्नाबाट टाउको र मेरुदण्ड लागेको चोटको एक लाखसम्मको निशुल्क उपचार

स्वास्थ्य

गृहपृष्ठ
स्वास्थ्य

सेतोपत्र डेस्क शनिबार, जेठ ५, २०८१

बिर्तामोड, जेठ ५ । झापाको बिर्तामोडस्थीत बीएन्डसी अस्पतालमा दुर्घट्नाबाट टाउको तथा मेरुदण्डमा लागेको चोटको एक लाख सम्मको निशुल्क उपचार हुने भएको छ । नेपाल सरकारको ‘विपन्न नागरिक औषधि कोष कार्यक्रम’ मा सूचीकृत भए पछि अस्पतालले यो सुविधा लागू गरेको बिएण्डसी अस्पतालका प्रवक्ता प्रोमिस गिरीले शुक्रबार आयोजित पत्रकार सम्मेलनमा जानकारी दिनुभयो ।

स्वास्थ्य विभाग र बीएन्डसी अस्पतालबीच उक्त कार्यक्रम लागू गर्ने सम्बन्धी सम्झौता भइसकेको र शुक्रवारदेखि नै सम्झौता बमोजिम बिरामीले सुविधा पाउन थालेको प्रवक्ता गिरीले बताउनुभयो ।
पत्रकार सम्मेलनमा बोल्दै अस्पतालका न्यूरो विभागका प्रमुख डा करुणा ताम्राकारले दुर्घट्नाका कारण टाउकामा भएको कुनै पनि चोटको उपचार गराउँदा नेपाल सरकारकै नीति अनुरुपको उक्त कार्यक्रमबाट विरामीले एक लाख रुपैयाँ बराबरको उपचार सुविधा पाउने बताउनुभयो ।

अस्पतालका हाडजोर्नी तथा नशा रोग विभागका प्रमुख डा निराजन पराजुलीले शल्यक्रिया गर्नु नपर्ने बिरामी भए तापनि विरामीले प्रक्रिया पूरा गरेर उपचार सुविधा लिन पाउने बताउनुभयो । अप्रेशन गर्दा रड हाल्नु पर्ने अवस्था आए त्यो सुविधा भने यो कार्यक्रमबाट नपाईने डा पराजुलीले बताउनु भयो । रड हाल्नु पर्ने भए रडको मुल्य बिरामी पक्षले नै तिर्नु तर अप्रेशन तर्फको एक लाखसम्मको उपचार खर्च विपन्न औषधी कोषबाट नै पाईने डा पराजुलीले पत्रकार सम्मेलनमा बताउनु भयो ।

प्रवक्ता गिरीले यस्तो सुविधा कोशी प्रदेशमै पहिलोपल्ट बीएन्डसीले पाएको बताउँदै यो सुविधा लिनका लागि अस्पतालबाट विरामीको सर्टिफिकेट लिएर स्थानीय पालिका जानु पर्ने र त्यहाँबाट सिफारिस लिएर आएपछि अस्पतालले एक लाख रुपैयाँसम्मको उपचार सुविधा दिने बताउनुभयो ।
पत्रकार सम्मेलनमा अस्पतालकी सञ्चालक डा अञ्जली कार्की प्रसाई, पूर्वाञ्चल क्यान्सर अस्पतालका मेडिकल सुपरिन्टेन्डेन्ट डा वीरेन्द्र यादव लगायतको उपस्थिति रहेको थियो ।

प्रकाशित मिति: शनिबार, जेठ ५, २०८१ ०६:३८