कोशी प्रदेश : विश्वासको मत सम्बन्धि विवाद दोस्रो पटक सर्वोच्चमा

देश

गृहपृष्ठ
देश

सेतोपत्र डेस्क बुधबार, भदौ ६, २०८०

झापा,भदौ ६ । कोशी प्रदेश सरकारसम्बन्धी विवाद दोस्रो पटक सर्वोच्च अदालतमा पुगेको छ। कोशी प्रदेशका मुख्यमन्त्री उद्धव थापाले संविधान मिचेर विश्वासको मत लिएको दाबी गर्दै नेकपा एमालेले दोस्रो पटक सर्वोच्च अदालतमा रिट दायर गरेको हो ।

यसअघि तत्कालीन सभामुख बाबुराम गौतमसमेतको समर्थनको हस्ताक्षर गरेर थापा पहिलो पटक असार २१ मा मुख्यमन्त्री नियुक्त हुदाँ पनि एमाले सर्वोच्च गएको थियो । असार २२ मा एमालेले रिट दायर गरेपछि अदालतले थापाको नियुक्ति बदर गरिदिएको थियो । त्यसपछि साउन १६ मा थापा पुनः मुख्यमन्त्री नियुक्त हुनुभएको हो । त्यसपछि यहि भदौ ४ गते सोमबार मुख्यमन्त्री उद्धव थापाले प्रदेशसभाको अध्यक्षता गरिरहेका इस्राइल मन्सुरीको पनि मत लिएर विश्वासको मत पाउनुभएको थियो ।

विश्वासको मत लिदा संविधानको उल्लङ्घन भएको दाबीसहित एमाले फेरी रिट लिएर सर्वोच्च पुगेको एमाले संसदीय दलका प्रमुख सचेतक रेवतीरमण भण्डारीले जानकारी दिनुभयो । भदौ ४ गते दिउँसो १ बजे प्रदेशसभा बैठक बोलाएर उपसभामुख सृजना दनुवार स्वास्थ्यको कारण देखाउँदै सोही दिन काठमाडौँ गएपछि प्रदेशसभा बैठक अध्यक्ष मण्डलका सदस्य काग्रेसका प्रदेशसभा सदस्य मन्सुरीले सञ्चालन गर्नुभएको थियो ।

मुख्यमन्त्रीको विश्वासको मतसम्बन्धी प्रस्तावमा मत विभाजनपछि दिएको मत सच्याउने समयमा मन्सुरीले सभाध्यक्षको आसनमा माओवादी प्रदेशसभा सदस्य गीता तिम्सिनालाई बोलाएर मतदान गर्न जानुभएको थियो । मन्सुरीसमेतको मतको आधारमा मुख्यमन्त्री थापाले ४७ मत प्राप्त गरी प्रदेशसभामा विश्वसको मत पाएका थिए । विपक्षमा ३० मत परेको थियो ।

यसैबिच प्रदेशसभा बैठक प्रतिपक्षी दलको विरोध र बहिष्कारका कारण अनिश्चितकालका लागि स्थगित गरिएको छ । आजका लागि आह्वान भएको बैठक सुरु हुनासाथ उठेर विरोध जनाउँदै प्रतिपक्षी दलका प्रदेशसभा सदस्यले नाराबाजीमा उत्रिएका थिए । प्रतिपक्षी नेकपा (एमाले) र राष्ट्रिय प्रजातन्त्र पार्टी (राप्रपा)का सदस्यले बैठक बहिष्कार गरेपछि अर्को सूचना जारी नभएसम्मका लागि बैठक स्थगित गरिएको हो ।

प्रकाशित मिति: बुधबार, भदौ ६, २०८० १६:४९